د ختیځ لبنیاتو کارخونې ستونزو د حل په موخه د همغږۍ ناسته وشوه  

د ننګرهار کرنې، اوبو لګولو او مالدارۍ رئیس مولوي محمد ولي محسن د ختیځ لبنیاتو کارخونې مسؤلینو او مالدارانو سره ناسته وکړه، ترڅو د مالدارانو پورونو، بازارموندنې او نورو اړونده ستونزو ته حل لارې ومومي.  
په دې ناسته کې مالدارانو او د کارخونې مسؤلینو خپلې ستونزې، غوښتنې او وړاندیزونه مطرح کړل.  
مولوي محمد ولي محسن مسؤلینو ته لازمي سپارښتنې وکړې او د مدیره هیئت غړو ته یې دوه میاشتې وخت ورکړ، ترڅو مالدارانو ته د تېرو کلونو د شېدو پاتې پیسې ورکړل شي.  
همداراز، پرېکړه وشوه چې کوپراتیفونه به د نوي طرزالعمل له مخې ثبتېږي او مالداران به په ټاکلي وخت شیدې فابریکې ته سپاري، ترڅو فابریکه بېرته خپل اصلي حالت ته راوګرځي.  
دا فابریکه څو کاله وړاندې د ختیځ زون د مالدارانو د لبنیاتو د پروسس په موخه جوړه شوې وه، خو په وروستیو کلونو کې له اقتصادي ستونزو سره مخ شوې ده. مسؤلین تمه لري چې د نویو پرېکړو له عملي کېدو سره، فابریکه بېرته ثبات ومومي او د مالدارانو ستونزې هوارې شي.