د ننګرهار د کانال رياست: د اته میلونه افغانیو په لګښت د کبانوحوضونه جوړ او ګټې اختسنې ته وسپارل شول
۳ وږی ۱۴۰۱ه.ش
۲۷ محرم الحرام ۱۴۴۴ ه.ق
د ننګرهار دکانال رياست چارواکي وايي، چې ددې رياست اړوند دويم فارم کې د اته میلونه افغانیوپه لګښت د کبانوحوضونه جوړ او ګټې اختسنې ته وسپارل شول.
د کانال رياست د چارواکو په خبره، د ننګرهارکانال ریاست دويم فارم کې په هغه ځمکه چې کلونه کلونه ترې ګټه نه اخستل کېده، اوس پرې د فردوس مومند خصوصي شرکت له خوا د اته میلونه افغانیو په لګښت په ۱۷ جریبه ځمکه د کبانو دوه سترحوضونه جوړ او تېره ورځ د ننګرهارکانال رئیس مولوي غلام الرحمن کظیم، د ننګرهار دکرنې رئیس مولوي ستار، د یاد شرکت مسوولینو هر یو شاه محمود، حاجي ممتاز ، طارق ناصري ، قومي مخورو او نورو په لاسونو د پټۍ په پریکولو ګټې اخستنې ته وړاندې شول
د کبانو په دې دوو سترو حوضونو کې چې په ( ۸ جریبه او ۹ جریبه) ځمکو کې جوړ شو دي، د ګراس او چینا ډولونو ۶۰ زره غوښن کبان روزل کېږی، چې په نږدې ورځو کې به د درنو هېوادوالو خدمت ته وړاندې شي.
دغه راز شاوخوا لس تنه په دې حوضونو کې په مستقيمه توګه او په سلګونه تنه په غیرې مستقیمه توګه په کاربوخت شوي دي.
د کانال رياست د چارواکو په خبره د همدې ځمکو د اجارې له درکه ننګرهارکانال ادارې ته میلونونه افغانۍ عواید په لاس راځي، د سیمي ارزښت او د کبانو صنعت ورسره وده کوي او په پایله کې د کورنې او ملي اقتصاد پیاوړتیا لامل کېږي.
د دوی په خبره یاد شرکت ته ۶۰ جریبه ځمکه په اجاره ورکول شوی، په راتلونکو ورځو کې دغه شرکت پلان لري چې دوه نور ستر د کبانو حضونه هم جوړ کړي.
باید وویل شي چې د کبانو صنعت ته د ودې او پراختیا په پار ننګرهارکانال ریاست په همدې دويم فارم ، څلورم او هډې فارمونو کې ۷۶ جریبه ځمکه خصوصي شرکتونو ته په اجاره ورکړي، دغو شرکتونو پرې د کبانو حوضونه جوړ کړي، او په پراخه پیمانه ترې کبان بازار ته وړاندې کوي.
