پکتیا: د کرنې رییس په مشرۍ سکتوري غونډه ترسره شوه
۱۷ زمری ۱۴۰۱ه.ش
۱۰ محرم الحرام ۱۴۴۴ ه.ق
د پکتيا ولايت د کرنې، اوبولګولو او مالدارۍ رياست په مقام کې له سکتوري رياستونو او همکارو برنامو سره سکتوري غونډه د ياد رياست د رئیس ښاغلي الحاج مولوي عبدالروف سعيد په مشرۍ ترسره شوه، چې پکې د سينديزې حوزې رئیس ښاغلي محمد کريم فاتح، د ولايت مقام او اقتصاد رياست استازو، د کرنې رياست آمرينو او د پاملرنې، اړيکو دفتر، سولې ريښې او د ځمکې او ځنګلونو د تلپاتې مدیریت پروژو مسؤلينو پکې ګډون کړي وو.
د غونډې په پیل کې ښاغلي سعيد په خپلو خبرو کې ګډونوالو ته د ښه راغلاست ترڅنګ د همکارو برنامو د تېرو کړنو د راپورونو او راتلونکو پلانونو له اوريدنې وروسته د همکارو برنامو له مسولينو وغوښتل، چې د سيلاب ځپلو او Lumpy Skin ويروسي ناروغۍ په برخه کې د مرستو جلبولو هڅه وکړي، همدا راز ښاغلي سعيد زياته کړه چې خپلې راتلونکې پروژې د سکتوري رياستونو سره په همغږۍ او لوړ کيفيت سرته ورسوي.
ورپسې د همکارو برنامو مسولينو په خپل وار سره د خپلو ترسره شويو کړنو مفصل راپور وړاندې کړل او خپل راتلونکي پلانونه يې د غونډې له ګډونوالو سره هم شريک کړل.
د يادولو وړ ده چې په راتلونکي کې به د کرنې، مالدارۍ، اوبولګونې، بديل معشيت او نورو برخو کې ځينې پروژې هم پلې شي.
