د ننګرهار د غنمو سږني حاصلات به نږدې ٢۰۰ زره ټنه وي

۴ غبرګولی ۱۴۰۰
د ننګرهاردکرنې، اوبولګولو او مالدارۍ ریاست وايي، چې په دې ولایت کې د غنمو لو پیل شوی دی، چې د اټکل له مخې دیاد ولایت د غنمو سږني حاصلات به نږدې ٢۰۰ زره ټنو ته ورسېږي.
د ننګرهار د کرنې رییس انعام الله صافی وایي، چې سږکال ددې ولایت په ۶۸زره او ۸۶۰ هکټاره ځمکه غنم کرل شوي دي، چې له دغو کروندو څخه به د اټکل له مخې ۱۹۲ زره او ۴۶۹ مټریک ټنه  غنم ترلاسه شي.
انعام الله صافی وایي، چې تېر کال یې په  ننګرهار کې د  غنمو ٦٥٢ ټنه اصلاح شوي تخمونه ویشلي، چې ورسره سږ کال په حاصلاتو کې د پام وړ زیاتوالې راغلې او ترڅنګ یې د کتار په ډول د غنمو د کرکېلي دودول، د ناروغیو او افاتو په تړاو عامه پوهاوي، د اوبخور د مناسبو وختونو پیژندنې په اړه بزګرانو ته روزنه او په نورو برخو کې بزګرانو ته روزنه ورکول ددې لامل شوي، چي په حاصلاتو کې زیاتوالی راشي.
باید وویل شي، چې تېر کال د ننګرهار په ۶۹ زره او ۲۶۲ هکټاره ځمکه غنم کرل شوې وه، چې له دغو کروندو څخه څه باندې ۱۹۰ زره او ۹۰۱ مټریک ټنه غنم ترلاسه شوې وه .