ننګرهار کې د کانالونو د پاکولو چارې پیل شوې  

په ننګرهار ولایت کې د ۱۷زره او ۴۸۰ امریکایي ډالرو په لګښت د کانالونو او فرعي ویالو د پاکولو چارې پیل شوې. دغه پروژه د ننګرهار کرنې، اوبو لګولو او مالدارۍ ریاست په همغږۍ، د بشري خیریه مؤسسې په تخنیکي همکارۍ، او د ډي آر اې او کورډېډ په مالي ملاتړ د مهمندرې او لعلپورې ولسوالیو کې پيل شوې، چې پکې ۱۰ کیلومتره اوږده دوه کانالونه او فرعي ویالې پاکېږي.  
د کرنې، اوبو لګولو او مالدارۍ رئیس مولوي محمد ولي محسن وايي، چې د دې پروژې له لارې ۲۰۰ بې‌روزګاره هېوادوالو ته د ۲۰ ورځو لپاره د کار زمینه برابره شوې.  
نوموړي زیاته کړه، چې د کانالونو پاکولو سره به زرګونه جریبه کرنیزو ځمکو ته د اوبو رسولو اسانتیا رامنځته شي.  
د بشري خیریه مؤسسې کرنیز مسوول انجنیر هدایت الله ثنایي وویل، چې د دې پروژې موخه خلکو ته د کار زمینې برابرول او د خوړو خوندیتوب ته وده ورکول دي، څو کورنۍ پر ځان بسیا شي.