کندهار کې د ۲۶ میلیونه افغانیو په ارزښت ۱۱ چکډېمونه ګټې اخیستنې ته وسپارل شول
۹ سلواغه ۱۴۰۳ه.ش
۲۸ رَجَب المُرَجَّب ۱۴۴۶ه.ق
د روان ۱۴۰۳ هـ ش کال د لسو میاشتو په اوږدو کې د کندهار په ۹ ولسوالیو کې د ۲۶ میلیونه او ۷۳۱ زره افغانیو په ارزښت ۱۱ چکډېمونه جوړ او ګټې اخیستنې ته وسپارل شول.
د کرنې، اوبو لګولو او مالدارۍ ریاست د طبیعي سرچینو آمریت تر څارنې لاندې، د ودانیزو شرکتونو په تخنیکي همکارۍ او د افغانستان اسلامي امارت د زعیم عالیقدرامیرالمؤمنین شیخ صاحب حفظهالله تعالی ورعاه د ځانګړي فرمان په اساس، دغه پروژې بشپړې شوې.
د کرنې ریاست د چکډیمونو د برخې مسؤل انجنیر نورمحمد همکار وویل چې یاد چکډیمونه د تېرو لسو میاشتو په اوږدو کې د غورک، کښته میوند، لوړ میوند، خاکریز، لوړ شاولیکوټ، ریګستان، او خاکریز ولسوالیو کې یو یو او په نېش او ارغستان ولسوالیو کې دوه دوه جوړ شوي دي.
د انجنیر همکار په وینا، د دې پروژو په جریان کې د یادو ولسوالیو شاوخوا ۳۵۰ سیمهییزو اوسېدونکو ته په فني او غیرفني برخو کې د کار زمینه هم برابره شوې وه.
د یادونې وړ ده چې د دې چکډېمونو له ګټې اخیستنې وروسته به په نږدې راتلونکي کې د کندهار په نورو ولسوالیو کې هم تر کار لاندې نورو چکډیمونو کارونه بشپړ او ګټې اخیستنې ته وسپارل شي.
