کونړ کې د اوبولګولو د ۱۲ کانالونو د جوړولو تړونونه لاسلیک شول

د کرنې، اوبولګولو او مالدارۍ وزارت اړوند دکرنې او خوړو خونديتوب بېړنۍ «EATS» پروژې له خوا د کونړ په ولایت کې د اوبولګولو د ۱۲ کانالونو د جوړولو تړونونه لاسلیک شول.
د کونړ د کرنې، اوبولګولو او مالدارۍ ریاست چارواکي وایي،
چې د اوبولګولو یاد کانالونه، چې ټولیز لګښت یې ۶۱ میلیونه افغانیو ته رسېږي د کرنې او خوړوخونديتوب بېړنۍ پروژې له لارې د نړيوال بانک په مالي مرسته د پراختیا یي شوراګانو په همکارۍ د کونړ په پنځو  ولسواليو کې جوړېږي.
دچارواکو په خبره ددغو کانالونو د جوړولو په ترڅ کې د سیمې یوشمېر اوسیدونکو ته د کاري زمینې برابرېدو ترڅنګ په بشپړېدو سره به یې سلګونه هکټاره ځمکه خړوبه شي.
په همدې حال کې د   کونړ مرستیال والي واصف الله واصفي وایي، د دغو کانالونو په جوړېدو به نه یواځې دا چې د اوبو د ضایعاتو مخنیوی وشي، بلکې ترڅنګ به یې د اوبه خور ساحه پراخه او سلګونو خلکو ته به کاري فرصتونه رامنځته کړي.
یاد کانالونه په پاخه او اساسي ډول جوړېږي، چې د اوبو د تنظیم او وېش په برخه کې د یادو سیمو د بزګرانو ستونزې په اساسي توګه حل کړي.
د دغو کانالونو رغول ددې ترڅنګ، چې د اوبو د ضایعاتو مخه نیسي د کانالونو تر پوښښ لاندې ځمکو د حاصلاتو د ډېر والي لامل هم کېږي.