لوګر کې د مڼو او شفتالو متراکمو بڼونو د جوړولو چارې پیل شوې

۷ وری ۱۴۰۰
د لوګر ولایت دکرنې، اوبولګولو او مالدارۍ ریاست د کرنې وزارت د بڼوالۍ ځنځیري ارزښت د ودې سکټوري پروژې «HVCDSP» په همکارۍ ددې ولایت په مرکز او درېوو ولسوالیو کې د مڼو او شفتالو د ۴۲ جریبه متراکمو بڼونو د جوړولو چارې پیل کړي دي.
د لوګر د کرنې ریاست چارواکي  وايي، چې یاد۴۲ جریبه بڼونه د لوګر ولایت مرکز پل علم او ددې ولایت په محمدآغې، خوښۍ او څرخ ولسوالیو کې جوړېږي.
د چارواکو په خبره د یو جریب متراکم بڼ د جوړولو لپاره هر بزګر ته ۶۳۰ نیالګي او کیمیاوي سره ورکړل شوي دي او په نږدې راتلونکي کې به د یادو بڼونو پر بڼوالو د بڼوالۍ اړونده توکي هم ووېشل شي.
د مڼو متراکمو بڼونو څخه موخه له کمې ځمکې لوړ او باکیفیته حاصل اخیستل دي. متراکم بڼونه د نوې ټکنالوژۍ یو ډول دی، چې د نورو عادي بڼونو په پرتله يې د تولید کچه څو برابره زیاته ده.