هلمند کې ۴۰ بېوزلو مېرمنو ته د کار زمینه برابره شوه
![هلمند کې ۴۰ بېوزلو مېرمنو ته د کار زمینه برابره شوه](https://www.mail.gov.af/sites/default/files/2020-12/whatsapp_image_2020-12-28_at_11.37.48_am_0.jpeg)
۸مرغومې ۱۳۹۹
د هلمند د کرنې، اوبولګولو او مالدارۍ ریاست د ملګرو ملتونو د خوړو او کرنې ادارې «FAO» په مالي مرسته ددې ولایت ۴۰ بېوزلو مېرمنو ته په خپلو کورونو کې د مرخېړیو روزنې په برخه کې د کار زمینه برابره کړه.
دغه کاري فرصتونه مېرمنو ته د مرخېړیو روزنې د ۱۵ اړینو توکو په وېش سره برابره شوې ده.
دهلمند د کرنې، اوبولګولو او مالدارۍ رییس زلمی الکو وایي، چې ددې ولایت ۴۰ بېوزله مېرمنې د مرخېړیو د تولید او پروسس په برخه کې روزل شوي دي، چې پر یادو مېرمنو د مرخېړیو د روزنې اړونده توکي هم وېشل شوي دي، ترڅو دوی په خپلو کورونو کې په کار بوختې شي او د خپلې کورنۍ اړتیاوې ورڅخه پوره کړي.
کومې مېرمنې چې اوس په دې ولایت کې د مرخېړیو د روزنې په برخه کې د فعالیت زمینه ورته برابره شوې ده، تر دې وړاندې په کورونو کې اوزګار ناست ول.
باید وویل شي، چې تر دې مخکې هم د هلمند په ولایت کې سلګونو بېوزلو مېرمنو ته دکرنې او خوړو پروسس په برخه کې د کارزمینه برابره شوې وه.