جوزجان کې د کرنیزو محصولاتو مدیریت د پروژې چارې په بشپړېدو دي
۵ لړم ۱۳۹۹
د جوزجان په ولایت کې د کرنې وزارت د کرنیزو محصولاتو مدیریت د پروژې په اډانه کې د ۳۳۶نويو کرنیزو پروژو چارې روانې دي، چې ډېر ژر به یې رغنیزې چارې بشپړ او ګټې اخیستنې ته به وسپارل شي.
د جوزجان د کرنې رییس محمدعالم عالمي وایي، چې په دغو پروژو کې ۱۵۰ عصري ممیزخونې، د پیازو ۱۵۰ او د کچالو ۲۰ صفر انرژۍ زېرمتونونه او د مېوو دوه صفر انرژۍ سړې خونې جوړول شامل دي، چې رغنیزې چارې به یې ډېر ژر بشپړ او ګټې اخیستنې ته به وسپارل شي. په ورته وخت کې ددې پروژې له لارې د یاد ولایت په یوشمېر کروندګرو مېرمنو د سبو او مېوو ۱۴ لمریز وچوونکي دستګاوې هم وېشل شوي دي.
د یادو پروژو ټولیز لګښت نږدې ۱۴۰ میلیونه افغانۍ ده، چې د جوزجان ولایت د مرکز شبرغان ترڅنګ ددې ولایت په لسو ولسوالیو کې د بزګرانو په لس سلنې او د کرنې وزارت په ۹۰ سلنه ونډې پلي کيږي.
