د هلمند د کرنې رییس د بست هوایي ډګر له چارواکو سره وکتل
۱ سلواغه ۱۴۰۲ه.ش
۹ رَجَب المُرَجَّب ۱۴۴۵ ه.ق
د هلمند دکرنې، اوبولګولو او مالدارۍ رییس الحاج مولوی نیاز محمد وهاج د بست هوایي ډګر له آمر سره په کتنه کې ددې هوایې ډګر اړوندو غصب شو ځمکو باندې خبرې اترې وکړې.
په دې کتنه کې د بست هوایي ډګر مسؤل په مرکز لښکرګاه کې د هوایي ډګر د حریمونو او اړوندو ځمکو د غصب په اړه کرنې رییس سره معلومات شریک کړل او ویې ویل: «هلمند کې د امارتي ځمکو د غصب مخنیوی او غصب شویو ځمکو د تثبیت تخنیکي پلاوي سره مو د یادو ملکیتونو د غصب معلومات شریک کړي دي او غوښتنه مو کړې ده، چې دغه عام المنفعه ملکیتونه له غاصبینو خلاص او ددې ادارې په واک کې ورکړل شي ترڅو په راتلونکي کې د یادو ځمکو څخه د میدان د پراخیدو ترڅنګ د حریمونو خوندیتوب ته پاملرنه ووشي.»
په همدې حال کې د هلمند دکرنې رییس د هوايي ډګر مسؤل ته د یادو ځمکو له غصب څخه د خلاصون په موخه د همکارۍ ډاډ ورکړ او څرګنده یې کړه، چې د هوایي ډګر د ځمکو د تشخیص او تثبیت په برخه کې به څیړنې کوي او د تخنیکي پلاوي د څیړنو او ارزونو راپور به له اړونده مقاماتو سره شریک کړي ترڅو د یادو ځمکو د استرداد په برخه کې لازم اقدامات ترسره شي.
