د هلمند سنګین کې سلګونو کورنیو ته د کار زمینه برابره شوې
۱۱ مرغومې ۱۴۰۲ه.ش
۱۹ جُمَادَى الثاني ۱۴۴۵ ه.ق
دهلمند ولایت د کرنې، اوبولګولو او مالدارۍ ریاست په هلو ځلو ، د جک مؤسسې، د خوړو او کرنې نړیوال ادارې په تخنیکي او د نړیوال بانک په مالي همکارۍ، د سنګین په ولسوالی کې سلګونو کسانو ته د کار کولو زمینه برابره شوې وه چې دامهال نږدې ١٣٧٦ تنو ته نغدې پیسې وویشل شوې.
په یاده پروسه کې ځایي اوسیدونکو ته د روزمزدو کاریګرو په توګه په دریوو برخو کې د کار زمینه برابره شوې وه، چې یادو کارګرانو ته د کار په مقابل کې هر کس ته د ٢٠ ورځو په لړ کې د ١٠٠ ډالرو معادل نغدې افغانۍ ورکړل شوې.
د یادې پروسې په لړ کې د اوبو چیکډیمونه، د اوبو ګبینونه، پلچکونه او د اوبو ګورې په اساسي ډول رغول شوي دي، چې د رغولو لګښت یې پورته نهادونو ورکړي دي.
دهلمند ولایت د کرنې ریاست هڅه کوي ترڅو په دې ولایت کې د اوبو مدیریت، د بزګرو لپاره د اسانتیاو برابرولو او خلکو ته د کارونو د برابرولو برخه کې لاهم خپلو هڅو ته دوام ورکړي، ترڅو ددې ولایت په کرنیزه برخه کې د پام وړ بهبود او نوښت رامنځته شي.
