ارزګان کې د ویالو پاکولو چارې روانې دي
۱۱ کب ۱۳۹۹
د ارزګان د کرنې، اوبولګولو او مالدارۍ ریاست وایي، چې د ملګرو ملتونو د خوړو او کرنې ادارې «FAO» په مالي او د «ANCC» موسسې په تخنیکي مرستو ددې ولایت د یوشمېر ویالو د پاکولو چارې پیل شوي دي.
د ارزګان دکرنې ریاست د چارواکو په خبره د ویالو پاکولو په دې لړۍ کې د ارزګان د مرکز ترینکوټ اړوند د طورې، سرشخلي، سفیدخار، او تالاني کلیو ۳۸ کیلو متره ویالې، چې کلونه کلونه پاک شوي نه دي پاکېږي او دغه راز خلکو ته د کاري فرصتونو برابرولو په پار د ارزګان مرکز ترینکوټ اړوند شاوخوا ۴۰ کیلو متره نورې فرعي ویالې هم پاکېږي.
باید وویل شی، چې د یادو ویالو په پاکولو سره نه یوازې دا چې د اوبولګولو چارې اسانېږي او د او د ضایعاتو مخه نیول کېږي ترڅنګ یې نږدې درې زره او ۱۰۰ بې وزله او جګړه ځپلو کسانو ته چې له خپلو مېنو بې ځایې شوي دي د کار زمینه هم برابره شوې ده.
