د هلمند دکرنې رییس د چرګوړو تولیدي فابریکو او د مالدارۍ فارم او چرګانو مارکېټ څخه لیدنه وکړه

۹ مرغومې ۱۴۰۴ه‍.ش
۹ رَجَب المُرَجَّب ۱۴۴۷ه‍.ق
دهلمند ولایت د کرنې، اوبولګولو او مالدارۍ رییس مولوي شیراحمد رفیع، دخپلو لیدنو او ارزونو په دوام، په مرکز لښکرګاه ښار کې د لبنیاتو د پروسس فابریکه او د بولان په سیمه کې د چرګوړو ایستلو (هیچري) فابریکې، د مالدارۍ فارم او چرګانو د پېر او پلور له مارکیټ څخه لیدنه وکړه. 
په دې لیدنو کې د مالدارۍ او حیواني روغتیا آمر حافظ هدایت الله هدایت او د یادو فابریکو او فارم مسؤل حاجي محمدالله هلمندوال هم د هلمند دکرنې رییس ملتیا کول.
د لیدنې پر مهال د لبنیاتو د پروسس فابریکې مسؤلینو څرګنده کړه، چې دلبنیاتو د پروسس فابریکه په ورځني ډول د شاوخوا ۴۰ټنه شېدو د پروسس وړتیا لري، چې دا چاره د مالدارانو د تولیداتو د بازارموندنې او ارزښت لوړولو کې مهم رول لري.
همدارنګه د چرګوړو ایستلو فابریکې په تړاو مسؤلینو وویل، چې دغه هیچري په میاشتني ډول د ٢٥٠ زرو چرګوړو د ایستلو ظرفیت لري او کولی شي د چرګانو د روزنې سکتور پیاوړی کړي.
ورپسې د هلمند دکرنې رییس بولان کې د مالدارۍ فارم او چرګانو د پېر او پلور له مراکزو هم لیدنې وکړې او د چارې یې وارزولې.
د هلمند دکرنې ریاست د مالدارۍ او حیواني روغتیا آمر حافظ هدایت الله هدایت د دواړو فابریکو، دمالدارۍ فارم، او د غوښینو چرګانو د پېر او پلور مرکز د فعالیتونو،  تخنیکي وړتیاوو او اقتصادي ارزښتونو په اړه تفصیلي معلومات وړاندې کړل او ویې، ویل چې دا فابریکې او تاسیسات د کرنې ریاست پر ملکیت جوړ شوي دي او خصوصي سکتور ته د پانګونې په موخه سپارل شوې، تر څو د تولید، کارموندنې او د ولایت د اقتصاد د ودې لامل شي.
د هلمند دکرنې رییس د یادو فابریکو، مالدارۍ فارم او د چرګانو د پېر او پلور مرکز فعالیتونه د هلمند لپاره ارزښتناک وبلل او ټینګار یې وکړ چې د خصوصي سکتور ملاتړ او د تولیدي بنسټونو پیاوړتیا به د بزګرانو او مالدارانو د عوایدو د زیاتوالي او د خوراکي توکو د ځان بساینې لور ته مهم ګام وي. هغه دارنګه د خصوصي سکتور څخه د لا حمایې او ملاتړ ډاډ څرګند کړ.