نجیب الله: میکانیزه کرکيلي سره مې حاصلات ډېر شوي

د کرنې، اوبولګولو او مالدارۍ وزارت په هېواد کې دکرنیزې ټکنالوژۍ او میکانیزه کرکېلي د دودولو په برخه کې تل هلې ځلې کوي ترڅو بزګران د کرنې له نوي ټکنالوژي سره بلد او میکانیزه کرکېلي سره بزګران وکولای شي، چې له خپلو کروندو څخه ښه او باکیفیته حاصل ترلاسه کړي، چې له یوې خوانه د بزګرانو عواید ډېر شي او له بلې خوانه هېواد د کرکېلي له پلوه پر ځان بسیا شي.
د هغو بزګرانو له ډلې، چې د کرنې وزارت له خوا د کرکېلي له نوي ټکنالوژي سره بلد شوي او میکانیزه کرکېله یې زده کړی دی یو هم د بدخشان ولایت د کشم ولسوالۍ د بلوچ علیا د کلي اوسیدونکی۲۹ نجیب الله دی.
نجیب الله کلونه کلونه په دودیزه بڼه بزګري کوله او د بزګرۍ له ټکنالوژي او میکانیزه کرکېلي سره نه وو بلد هغه وویل: «له کلونو را په دې خوا مې په خپله کرونده کې د وریجو کرکېله په دودیزه توګه تر سره کوله؛ زحمت یې زیات خو حاصل یې په نشت حساب و.»
نجیب الله ته په ۲۰۱۹ ام کال کې د کرنې وزارت اړوند د امو پنځمې حوزې پروژې له خوا د شولې د کرکېلي یوه ننداریزه قطعه جوړه شوه، چې حاصلات یې ډېر او د اوبو ضایعات یې کم و.
نجیب الله ددې ننداریزې قطعې په هکله وایي: «پخوا به مې د وریجو کرکیله په عنعنوي ډول تر سره کوله خو سږ کال د امو پنځمې حوزې پروژې په مرسته د« RIPA» یا د کتار په شکل د شولو یوه ننداریزه قطعه راته جوړه شوه، چې حاصل یې خورا ډېر او د اوبو ضایعات او د کیمیاوي سرو مصرف یې لږ او همدارنګه رېبل يې آسانه وه.»
نجیب الله وایي: «ددې ننداریزې قطعې په لېدو به تل په همدې شکل د وریجو کرکېله کوم، ځکه هم یې چارې اسانې دي او هم یې حاصل ښه دي. د کرنې وزارت څخه هم مننه کوم، چې په هره برخه کې له موږ بزګرانو سره مرسته او همکارۍ کوی.»
هغه زیاته کړه، په رواجي سیستم کې د یو جریب ځمکي لپاره ۳۰ کیلو ګرامه تخم کارول کیږي خو په خطي سیستم کې د همدې ځمکي لپاره شپږ کیلو ګرامه تخم وکارول شو او همدارنګه په خطي سیستم کې خیشاوه په آساني سره ترسره شوه خو په رواجي سیستم کې موږ د خیشاوه کولو په برخه کې له خورا ګڼو ستونځو سره مخامخ و.
نجیب الله وویل: «تېرکال مو له یو جریب ځمکې څخه ۶۰۰ کیلو ګرامه وریجي ترلاسه کړې خو د خطې سیستم په کارولو سره مو سږ کال له یو جریب ځمکې څخه ۸۰۰ کیلو ګرامه وریجه ترلاسه کړه.»
د « RIPA» په ډول د وریجو کرکېله د لومړي ځل لپاره په افغانستان کې د « RIPA» موسسې لخوا په ۲۰۰۷ زیږدیز کال کې په ننګرهار ولایت کې پلي شو. د کرکیلي یاد ډول د اوبو د ضایعاتو مخه نیسي او همدارنګه د دودیز سیستم په توپیر يې حاصلات خورا زیات وي.
دکتار « RIPA» په ډول دشولو کرل د نوي او عصري میتودونو د زده کړې او رواجولو په موخه جوړیږي. په دې بڼه د شولو کرکېله د شولو حاصلات له ۲۵ تر ۳۰ سلنه زیاتوي.د چارواکو په خبره که چیرې شولې په محلي توګه دپاشان په ډول وکرل شي نو له یوه هکټاره ځمکه یې په منځنۍ کچه څلور ټنه شولې په لاس راځي او که چیرې په عصري توګه د کتار په بڼه وکرل شي نو له یوه هکټاره ځمکه یې په منځنۍ کچه شپږ ټنه شولې په لاس راځي.
له همدې امله دکرنې وزارت دترویج کارکوونکي په کلیو او ولسوالیو کې دیاد میتود درواجولو په موخه بزګرانو ته د شولېننداریزې قطعې جوړوی.