کونړ کې پر نږدې ۱۵ زره بزګرانو د غنمو اصلاح شویو تخمونو او کیمیاوي سرو وېش لړۍ پیل شو

د کونړ ولایت دکرنې، اوبولګولو او مالدارۍ ریاست د ملګرو ملتونو د خوړو اوکرنې ادارې په مالي او د افغانستان د کلیو د بیارغونې ادارې «آر.آر.اې.اې» په تخنیکي همکارۍ ددې ولایت د مرکز او ولسوالیو پر ۱۴ زره او ۴۰۰ مستحقو بزګرانو د غنمو د اصلاح شویو تخمونو او کيمياوي سرو وېش لړۍ پیل کړی دی.
په دې اړه جوړه شوې غونډه کې د کونړ مرستیال والي، دکرنې رییس او یوشمېر نورو سیمه ییزو چارواکو حضور درلود.
 د کونړ دکرنې، اوبولګولو او مالدارۍ ریاست چارواکو د ملګرو ملتونو د خوړو او کرنې نړیوال پروګرام له مرستو د مننې ترڅنګ له هغوی وغوښتل، تر څو بزګرانو ته په دغه ولایت کې د مرستو لمن وغځوی، ترڅو د لیرې پرتو ولسوالیو بزګران هم ترې برخمن، هغه دغه راز له بزګرانو وغوښتل، چې له دغو مرستو څخه به سمه توګه ګټه پورته او د ترویج په برخه کې یې هلې ځلې وکړي.
په همدې حال کې د کونړ مرستیال والي هم په خپلو خبرو کې د غنمو اصلاح شویو تخمونو او کیمیاوي سرو وېشل اغېزناک ګام وبلل او له ټولو برخمنو بزګرانو څخه یې وغوښتل، چې یاد اصلاح شوي تخمونه په سمه توګه په خپلو کروندو کې وکري، ترڅو د غنمو حاصلات ډېر او افغانستان په دې برخه کې ځان بسیاینې ته نږدې شي.
باید وویل شی یاد بزګران د سروې له مخې اړمن پېژندل شوی وو چې د مرستو تر څنګ ورته د کرکیلې اړوند لازمې لارښوونې هم شوی دی،په یادو مرستو کې هر بزګر ته ۵۰ کیلو ګرامه د غنمو اصلاح شوی تخم ۵۰ کیلو  توره کېمیاوي سره او ۵۰ کیلو یوریا سپینه سره وېشل کېږي.
د دې مرستې د وېش موخه د بېوزله بزګرانو ملاتړ او په ټوله کې د دوی د کرنیزو محصولاتو زیاتوالی له لارې د دوی عوایدو زیاتوالي ته زمینه برابرول دي.