۷ سلواغه ۱۳۹۸
د لغمان د کرنې، اوبولګولو او مالدارۍ ریاست چارواکي وایي، چې د « PMS» موسسې په همکارۍ ددې ولایت یوشمېر سربندونه او کانالونه جوړیږي. د لغمان د کرنې ریاست د چارواکو په خبره د جوړېدونکو سربندونو او کانالونو له ډلې د زېړانیو سربند او کانال او د نهر کریم سربند او کانال د جوړولو په پار لومړنی سروې تر سره شوي او د رغولو چارې به یې ډېر ژر پیل شي.
د لغمان دکرنې ریاست وایي، چې د زېړانیو د سربند کانال ۲۲ کیلو متره اوږدوالی لري، چې په جوړېدو سره به یې یو زر او ۹۰۰ هکټاره نوي کرنیزې ځمکې د خړوبولو تر پوښښ لاندې راشي او دغه راز د نهرکریم سربند او کانال به دوه زره هکټاره نوي کرنیزې ځمکې خړوبې کړي.
د لغمان د کرنې ریاست چارواکي وایي، چې یاد سربندونه او کانالونه په پاخه او اساسي ډول جوړیږي، چې په جوړېدو سره به یې زر ګونه جریبه نوي کرنیزې ځمکې خړوبې او زرګونه کورنۍ به ورڅخه هر اړخیزه ګټه پورته کړي
د دې پروژې پلي کول که له یوې خوا د اوبو د ضایعاتو مخه نیسي له بلې خوانه د دې سیمې د کرنیزو محصولاتو د کیفیت او کچې په لوړولو کې مرسته کوي او د بزګرانو په اقتصادي وده کې به رغنده رول ولري.