لغمان کې پر لسګونو مالدارو کورنیو د څارویو خوراکي توکي وېشل کېږي

۴ زمری ۱۴۰۴ هـ.ش
۳۰ مُحرَّمُ الحرام ۱۴۴۷ هـ.ق
د لغمان د کرنې، اوبولګولو او مالدارۍ ریاست تر چتر لاندې، د افغانستان لپاره د هالینډ کمېټې په مالي ملاتړ، د دې ولایت ۳۷ مالدارو کورنیو ته د وریو د چاغښت په موخه د څارویو خوراکي توکو د مرستې ویش لړۍ پیل شوه.
یاده لړۍ د لغمان د کرنې، اوبولګولو او مالدارۍ رییس مولوي عبدالستار محمد، د هالینډ کمېټې ولایتي مسؤل ډاکټر محمد بیدار سیرت، او د مالدارۍ او حیواني روغتیا آمر ډاکټر جوادالله علیزاده له‌خوا څو مستحقو کورنیو ته د خوراکي توکو په ورکړې سره رسماً پیل شوه.
د لغمان د کرنې رییس مولوي عبدالستار محمد وویل: «دا مرسته چې ۱۶ کورنیو ته په مرکز مهترلام او ۲۱ کورنیو ته د الیشنګ ولسوالی په کچه ځانګړې شوې، هرې کورنۍ ته ۱۰۰ کیلوګرامه حیواني خوراکه ورکول کېږي.»
نوموړي زیاته کړه، چې د دې پروګرام موخه د پسونو چاغښت، د اړمنو مالدارو ملاتړ او د مالدارۍ سکتور پراختیا ده.         همداراز، نوموړي د هالینډ کمېټې له دغې مرستې څخه مننه وکړه او هیله یې څرګنده کړه، چې دا ډول مرستې دوام پیدا کړي او لا پراخې شي.