د لغمان د کرنې رییس او د اکشن ایډ مؤسسې د سي.بارډ.ال پروژې ولایتي مسؤل تر منځ د همکاریو په اړه خبرې اترې وشوې
١٩ تله ۱۴۰۳ه.ش
٧ رَبِیعُ الْثاني ۱۴۴۶ه.ق
د لغمان د کرنې، اوبولګولو او مالدارۍ رییس مولوي عبدالستار محمد په خپل دفتر کې د اکشن ایډ مؤسسې اړوند د (سي.بارډ.ال) پروژې ولایتي مسؤل ګل ویس وزیر او د دې پروژې نورو همکارانو سره وکتل، ترڅو د چارو د ښې همغږۍ او راتلونکو برنامو په اړه خبرې وکړي.
په دې کتنه کې د (سي.بارډ.ال) پروژې مسؤل ګل ویس وزیر د پروژې په تېرو فعالیتونو او نويو برنامو رڼا واچوله. هغه د کرنې ریاست څخه مننه وکړه، چې تل یې د دوی سره د فعالیتونو په تطبیق کې همکاري او سپارښتنې کړي دي. نوموړي زیاته کړه چې پلان لري په لغمان کې د کرنیزو محصولاتو د بازار موندنې لپاره یو نندارتون پرانیزي ترڅو د بزګرانو تولیدات بازار ته وړاندې شي. همدارنګه یې یادونه وکړه چې د مهترلام او قرغیو په ولسوالیو کې د کانالونو د رغنیزو چارو پروژې هم تطبیق کوي.
په ورته وخت کې، د کرنې رئیس مولوي عبدالستار محمد د اکشن ایډ مؤسسې مسؤلینو ته د ښه راغلاست ویلو ترڅنګ د چارو په پلي کېدو کې د هر راز همکارۍ ډاډ ورکړ. هغه له دوی څخه مننه وکړه چې تل یې د کرنې ریاست سره په تفاهم او ښې همغږۍ خپل فعالیتونه ترسره کړي دي. رئیس زیاته کړه چې د متوازنې پراختيا په پار، د لغمان په پاتې ولسوالیو کې هم د پروژو پلي کېدو ته اړتیا ده او دوی یې وهڅول چې خپل پروګرامونه پراخ کړي.
