د ځمکو چارو لوی رییس: د اسنادو په تعقیب او خپلو دندو کې د مراتبو لړۍ مراعات کړئ
په هغه غونډه کې، چې د ځمکو چارو رياست د لوی رییس ملا عبدالرحمن رحماني په مشرۍ جوړه شوه؛ د استملاک او بیا مېشتدنۍ او د جیودیزۍ او کدستر عمومي ریاستونو د مسوولینو په ګډون د دغو څانګو تر چتر لاندې ریاستونو مسوولين هم ګډون درلود.
د غونډې په پیل کې د ځمکو چارو ریاست د جیودیزۍ او استملاک عمومي ریاستونو چارواکو په خپل وار خپل وړاندیزونه او ستونزې د ځمکو چارو ریاست له مشرتابه سره شریکې کړې.
په پیل کې د جیودیزۍ او کدستر ریاست مسوولینو د ترانسپورت او حاضرۍ برخې مسولینو د نه همکارۍ همداراز د دغه څانګې د یو شمېر رئیسانو د موټرو نشتون، د غیر مسلکي کسانو ګمارنه او نورو اداراتو نه همکارۍ يې د دغې برخې ستونزې و بلل.
ورپسې د استملاک او بیا مېشتدنې ریاست مسوولینو هم په خپل وار خپلې ستونزې د ځمکو چارو ریاست له مشرتابه سره کړل؛ د دوی په ټکو د تنظیم او وېش په ریاست کې هغه برخې چی اوس مهال د قرنطین په حالت کې دي او هغه مکتوبونه چې د اراضۍ ریاست لخوا د کرنې وزارت د مشرتابه په لاسلیک د افغانستان اسلامي امارت مسوولینو ته لېږل کېږي خو له بده مرغه بېرته دې ادارې ته نه استول کېږي او د قبالو او د غیر رسمي ښاري سيمو د ثبت ریاستونو فعالیتونه چې تر اوسه په ټپه ولاړ دي اصلي ستونزې دي.
همداراز د استملاک او تصفيې په رياستونو کې د ځمکوالۍ په برخه کې د شته ستونزو او نوي ګمارل شوي کارکوونکو ته د ښونیز سمینارونو په جوړونه کې هم خبرې او خپل نظرونه یې شريک کړل.
د اطلاعاتي تکنالوجۍ او د اداري برخې مسولینو هم خپلې ستونزې او وړانديزونه د ځمکو چارو ریاست له مشرتابه سره شرکې او هر اړخيز معلومات يې ورکړل.
په پای کې د کرنې وزارت د ځمکو چارو لوی رییس ملا عبدالرحمن رحماني د ریاستونو د مسوولینو د خبرو له اورېدو وروسته هغوی ته يې لازمې لارښوونې وکړې.
همدارنګه د ځمکو چارو رياست مشرتابه د دغه رياست ټولو مسوولينو ته لارښوونه وکړه تر څو د اسنادو په تعقیب او په خپلو دندو کې د مراتبو لړۍ په مراعاتولو سره خپلې دندې په سمه توګه ترسره کړي.
