د لوګر دکرنې ریاست: تر څه باندې دوه لسیزو وروسته، د سرخاب بند دوه دروازې پرانیستل شوې
۷ مرغومې ۱۴۰۱ه.ش
۴ جُمادیَ الثّاني ۱۴۴۴ ه.ق
د لوګر دکرنې، اوبولګولو او مالدارۍ ریاست وایي، چې ددې ولایت د محمدآغې ولسوالۍ اړوند د سرخاب بند دوه دروازې، چې په تېرو څه باندې دوه لسیزوکې یې چارې په ټپه ولاړې وې، د افغانستان اسلامي امارت د بیا واکمنېدو را پدېخوایې چارې پیل او ګټې اخیستنې ته وسپارل شوې.
د یادې پروژې د پرانیستې په مراسمو کې دلوګر د کرنې اوبولګولو او مالدارۍ رییس مولوی سید امین هاشمي سربره د محمدآغې ولسوال مولوي میرهاشم(حزب الله)، د لوګر د سیندیزې حوزې رییس حاجي عمراخان صدیقي او یو شمېر نورو چارواکو برخه اخیستې وه.
مسوولین وایي، د سرخاب بند یادې دواړه دروازې، د ځایي خلکو له لوري، د کار په بدل کې د غنمو د وېش پروګرام له لارې د رسوبي ډبرو او خټو څخه پاکې شوي، چې په وینایې پرسرخاب سربېره د زرغون ښار او یو شمېر نورو سیمو لپاره اغیزمنه او حیاتي پروژه ده، چې په مستقیم ډول به کروندګر او نور عام خلک ورڅخه ګټه پورته او نږدې درې زره هکټاره ځمکې خړوبولو کې به ورڅخه ګټه واخیستل شي.
