ننګرهار: د خوړو او کرنې نړيوالې ادارې(FAO) سيمه ييزو مسؤلینو سره ناسته ترسره شوه
۹ چنګاښ ۱۴۰۱ ه.ش
۱ ذوالحجَّة ۱۴۴۳ ه.ق
د ننګرهار د کرنې، اوبولګولو او مالدارۍ ریاست رئيس مولوی عبدالستار محمد د خپل کار په دفتر کې د ملګرو ملتونود خوړو او کرنې نړيوالې ادارې (FAO) له ساحوي مسؤل انجینر محمد خوشحال آصفي سره وکتل.
په دې کتنه کې د ملګرو ملتونو د خوړو او کرنې نړيوالې ادارې(FAO) ساحوي مسؤل انجینر محمد خوشحال آصفي په ننګرهار ولایت کې د تر سره شويو فعالیتونو په اړه خپل معلومات د ننګرهار کرنې ادارې له رئیس سره شریک کړل، آصفي په خپلو خبرو کې یادونه وکړه، چې یاده اداره پلان لري چې په ختیځ زون کې د اوبولګولو په برخه کې د چیکډیمونو جوړول، تراسونو جوړول، استنادي دېوالونو جوړول او زهبرونو پاکولو پروژي او همدارنګه د کرنې په برخه کې د مختلفو تخمونو او کیمیاوي سرو او د مالدارۍ برخه کې د حیوانې خوراکې د وېش پروژي پلي کړي.
په همدې حال کې د ننګرهار د کرنې ادارې رئيس مولوی عبدالستار محمد د (FAO) ساحوي مسؤل ته د پروژو د تطبیق په برخه کې د هر راز همکاريو ډاډ ورکړ، او زیاته يي کړه، چې د تېرو اورښتونو له امله په حصارک، سپین غر، نازیان، شیرزاد، اچین، دره نور، مهمندره او کوټ ولسوالیو کې زیات شمېر مالداران او بزګران زیانمن شوي دي، چې باید عاجلي مرستې ورسره وشي.
