د کندهاري مالدارانو د مالونو خوندي کولو په پار هلې ځلې
۳۱ چنګاښ ۱۳۹۹
د کندهار د کرنې، اوبولګولو او مالدارۍ ریاست ددې ولایت د مالدارانو د مالونو خوندي کولو او د مالونو د ناروغیو د تشخیص او مصنوعي القاح په موخه ددې ولایت ۲۰ تنه وټرنران روزلي دي.
د کندهار دکرنې ریاست وایي، چې دغه لس ورځنۍ روزنیز پروګرام د (AVC-L) پروژې په همکارۍ په لاره اچول شوې وه، چې په ترڅ کې یې ګډونوالو ته د څارویو د کلینیکي ناروغیو د تشخیص او دغه راز د مصنوعي القاح په اړه هر اړخیز علمي او نظري زده کړې ورکړل شوي دي.
د کندهار د کرنې ریاست یاد روزنیز پروګرام د وټرنرانو د ظرفیت لوړولو، د ښو خدماتو د عرضې او د غوښې د ارزښت د معلومولو په برخه کې خورا اړین وباله.
د چارواکو په خبره ددې روزنیز پروګرام په لړ کې د ځانګړو ټرینرانو له لوري سیه ییزو وټرنرانو ته د روزنې ترڅنګ د وټرنرۍ اړوند اړین توکي هم ور کړل شوي دي.
