هلمند کې د څارویو د روغتیا ساتنې په موخه د واکسیناسیون کمپاینونه دوام لري؛ په مارجې کې ۵۹۴ څاروي واکسین شول او په باباجي کې د ۷۵۰۰ څارویو د واکسین کمپاین پیل شو
د هلمند ولایت د کرنې، اوبولګولو او مالدارۍ ریاست د څارویو د روغتیا ساتنې، د ساري ناروغیو د خپرېدو مخنیوي او د مالدارانو د اقتصادي زیانونو د راکمولو په موخه په بېلابېلو ولسوالیو کې د واکسیناسیون کمپاینونه پلي کوي.
د دغو هڅو په لړ کې، د مارجې ولسوالی په بېلابېلو کلیو کې د مالدارۍ او حیواني روغتیا آمریت په تخنیکي همکارۍ، د غټو او کوچنیو څارویو د واکسیناسیون بهیر ترسره شو، چې په ترڅ کې یې ۱۸۴ غټو او ۴۱۰ کوچنیو، په ټولیز ډول ۵۹۴ څارویو ته واکسین تطبیق شو.
همدارنګه، د هلمند ولایت د باباجي ولسوالی په اړوندو سیمو کې د غټو او کوچنیو څارویو د طبق ناروغۍ پر وړاندې د واکسیناسیون کمپاین هم پیل شوی دی. د دغه کمپاین په ترڅ کې به د هلمند د کرنې، اوبولګولو او مالدارۍ ریاست د مالدارۍ او حیواني روغتیا آمریت په تخنیکي همکارۍ ۷۵۰۰ غټو او کوچنیو څارویو ته واکسین تطبیق شي.
د یادو کمپاینونو موخه د څارویو ترمنځ د ساري ناروغیو، په ځانګړي ډول د طبق ناروغۍ، د خپرېدو مخنیوی، د څارویو د روغتیا خوندي کول او د مالدارانو د احتمالي اقتصادي زیانونو راکمول دي.
د هلمند د کرنې ریاست هڅه کوي، چې د واکسیناسیون د منظم کمپاینونو او حیواني روغتیايي خدمتونو د پراختیا له لارې د څارویو د ناروغیو مخه ونیسي، د مالدارۍ سکټور پیاوړی کړي او د مالدارانو د تولیداتو او اقتصادي وضعیت په ښهوالي کې مرسته وکړي.
