د غزني د کرنې رییس: د بزګرانو او قوریهدارانو د ستونزو حل ته به لازم اقدامات وشي
۱۶ تله ۱۴۰۵ هـ.ش
۲۵ رَبِیعُ الْثاني ۱۴۴۸ هـ.ق
د غزني ولایت د مرکز یو شمېر قومي مشرانو، سپینږیرو او د قوریهدارانو د اتحادیې رییس، د غزني ولایت د کرنې، اوبولګولو او مالدارۍ له رییس مولوي محمد اسماعیل «شکیب» سره وکتل او د کرنې، بڼوالۍ او قوریهدارۍ په برخو کې یې د شته ستونزو او اړتیاوو په اړه خبرې وکړې.
په دې لیدنه کې قومي مشرانو، سپینږیرو او د قوریهدارانو استازي خپلې ستونزې، غوښتنې او وړاندیزونه له نوموړي سره شریک کړل. دوی د کرنیزو پروژو د تطبیق، د بڼوالۍ د پراختیا او ملاتړ، د قوریهدارانو د ستونزو د حل او د بزګرانو د ملاتړ په برخو کې د کرنې ریاست د لا زیاتې همکارۍ غوښتنه وکړه.
د غزني د کرنې، اوبولګولو او مالدارۍ رییس د دوی د ستونزو او غوښتنو له اورېدو وروسته، د همکارۍ ډاډ ورکړ او ویې ویل، چې ریاست هڅه کوي د کرنې، اوبولګولو او مالدارۍ وزارت او همکارو مؤسسو په همکارۍ د کرنې او مالدارۍ د پروژو د پلي کېدو زمینه برابره او د بزګرانو او قوریهدارانو د ستونزو د حل لپاره لازم اقدامات ترسره کړي.
نوموړي زیاته کړه چې د کرنې، بڼوالۍ او قوریهدارۍ د برخو پیاوړتیا د کرنیز تولید د زیاتوالي او د بزګرانو د عوایدو د لوړولو لپاره مهمه ده او په دې برخه کې د سیمهییزو خلکو، قومي مشرانو، قوریهدارانو او بزګرانو همکاري او همغږي ارزښت لري.
د غزني ولایت د کرنې، اوبولګولو او مالدارۍ ریاست د کرنیز سکتور د پراختیا، د بزګرانو د ملاتړ، د بڼوالۍ د ودې او د قوریهدارۍ د پیاوړتیا په موخه د اړوندو ادارو، همکارو مؤسسو او سیمهییزو خلکو ترمنځ د همغږۍ د رامنځته کولو لپاره هڅې کوي. د ورته ناستو له لارې د بزګرانو او قوریهدارانو ستونزې او اړتیاوې په مستقیم ډول راټولېږي او د حل لپاره یې د اړوندو ادارو له لارې د اقداماتو زمینه برابرېږي.
په پای کې د کرنې د سکتور د لا پراختیا، د بزګرانو او قوریهدارانو د ستونزو د حل او د کرنیزو فعالیتونو د پیاوړتیا په موخه د کرنې ریاست، قومي مشرانو، قوریهدارانو او بزګرانو ترمنځ د دوامدارې همغږۍ او همکاریو پر پیاوړتیا ټینګار وشو.
