ننګرهار کې له ۲٤ بزګرانو سره د شفتلو اصلاح شوي تخم، کیمیاوي سرې او کرنیزو وسایلو مرسته وشوه

۲۳ وږی ۱۴۰۵ هـ.ش
۱ رَبِیعُ الْثاني ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست په هڅو، د افغانستان لپاره د هالینډ کمېټې په تخنیکي همکارۍ او د اروپایي ټولنې په مالي ملاتړ، د بټي کوټ او روداتو ولسوالیو له ۲٤ تنو بزګرانو سره د شفتلو اصلاح شوي تخم، کیمیاوي سرې او کرنیزو وسایلو مرسته وشوه.
د معلوماتو له مخې، هر بزګر ته دنیم جریب ځمکې لپاره څلور کیلوګرامه د شفتلې اصلاح شوی تخم،شپږ کیلوګرامه توره سره او ۱۴ کیلوګرامه سپینه سره ورکړل شوه. همدارنګه د کرنیزو فعالیتونو د لا ښه ترسره کولو په موخه هر بزګر ته یوه بېلچه، تسکوره، لور او پنجې هم ووېشل شوې.
د یادو مرستو موخه د اقلیم بدلون سره دمناسبې کرنې او د قدرتي سرچینو څخه  سالمه استفاده، د مالدارانو لپاره د څارویو د اړتیا وړ علوفی برابرول، د لبني محصولاتو د کچې لوړول، د اړمنو مالدارو بزګرانو ملاتړ او د هغوی د اقتصادي وضعیت پیاوړتیا ده.
د کرنیزو اصلاح شویو تخمونو او اړینو وسایلو وېش کولی شي د بزګرانو د تولید کچه لوړه او د مالدارۍ په برخه کې د څارویو د تغذیې ستونزې تر یوه بریده راکمې کړي، چې ورسره د کورنیو عایدات او اقتصادي ثبات هم پیاوړی کېږي.