د ننګرهار شینوارو کې د حیواني کلینیکونو څخه هراړخیزه څارنه ترسره شوه
۱۲ زمری ۱۴۰۵ هـ.ش
۱۹ صَفَر المُظَفَّر ۱۴۴۸ هـ.ق
د ننګرهار د کرنې، اوبولګولو او مالدارۍ ریاست اړوند د شینوارو ولسوالی د وترنرۍ او مالدارۍ مدیریتونو تخنیکي پلاوي د یادې ولسوالی په بېلابېلو سیمو کې د حیواني کلینیکونو او د مرغدارۍ درملتونونو څخه هراړخیزه څارنه ترسره کړه.
د دغې څارنې اساسي موخه د بېکیفیته، غیرمعیاري او تاریختېرو درملو او واکسینونو د پلور مخنیوی، د کلینیکونو او درملتونونو د قانوني جوازونو ارزونه، د مسلکي اصولو د مراعات ډاډمنول، او مالدارانو او د چرګانو روزونکو ته د معیاري، خوندي او اغېزمنو وترنري خدمتونو د وړاندې کېدو تضمین و.
د څارنې پر مهال هغه کلینیکونه او درملتونونه چې د فعالیت قانوني جواز یې نه درلود، یا یې د جواز اعتبار پای ته رسېدلی و، د نافذه قوانینو او مقرراتو له مخې ورته د جواز د ترلاسه کولو او یا د نوي کولو سپارښتنې وشوې. همدارنګه وترنر ډاکترانو او د درملتونونو مسؤلینو ته لازمې مسلکي لارښوونې ورکړل شوې، ترڅو د غیرمعیاري او تاریختېرو درملو او واکسینونو له پلور او د غیرمسلکي کسانو له ګمارنې څخه په کلکه ډډه وکړي او خپل فعالیتونه د نافذه قوانینو او مسلکي معیارونو سره سم پر مخ یوسي.
د څارنې په لړ کې یو شمېر تاریختېر درمل هم وموندل شول، چې د اړوندو مسؤلینو له لوري راټول او ضبط شول. په همدې تړاو مسؤلینو ته جدي سپارښتنې وشوې، ترڅو د درملو د اعتبار مودې ته ځانګړې پاملرنه وکړي او په راتلونکي کې د تاریختېرو درملو له ساتنې او پلور څخه په بشپړه توګه ډډه وکړي.
د ننګرهار د کرنې، اوبولګولو او مالدارۍ ریاست ژمن دی، چې د ورته دوامدارو څارنو او نظارتي پروګرامونو له لارې به د حیواني او مرغدارۍ روغتیايي خدمتونو کیفیت لا لوړ، قانوني فعالیتونه پیاوړي او مالدارانو او د چرګانو روزونکو ته د باور وړ، معیاري او خوندي وترنري خدمتونو د وړاندې کولو لپاره لا زیاتې هڅې ترسره کړي.
