د کرنې وزارت لهخوا د کانونو او پټرولیم وزارت ته ځمکه ولېږدول شوه
۲۵ برګولی ۱۴۰۵ هـ.ش
۲۹ ذُوالحجّة ۱۴۴۷ هـ.ق
د کرنې، اوبولګولو او مالدارۍ وزارت د اراضۍ ریاست کې جوړه شوې غونډه کې، چې د ځمکو د استملاک او بیا مېشتېدنې عمومي رییس مولوي عبدالعلي عمري، د ځمکو د انتقال او وېش رییس حافظ عبدالکبیر زاهد او د کانونو او پټرولیم وزارت د مس عینک پروژې رییس انجنیر حمیدالله حبیبي ګډون درلود، د کرنې وزارت لهخوا د کانونو او پټرولیم وزارت ته ځمکه ولېږدول شوه.
ياده ځمکه د کرنې وزارت د ځمکو د انتقال او وېش رياست په وړانديز او د عالیقدر امیرالمؤمنین (حفظه الله تعالی) د حکم په اساس د اراضۍ لوی رياست لهخوا ياد وزارت ته د لوګر ولايت محمد اغې ولسوالی کې په (۱۰۵۰۷) جريبه ځمکه د مسو د راايستلو په موخه ولېږدول شوه.
د یادې ځمکې لېږد ټړون د کرنې وزارت اراضۍ ادارې د استملاک او بیا مېشتېدنې عمومي رییس مولوي عبدالعلي عمري، د ځمکو د انتقال او وېش رییس حافظ عبدالکبیر زاهد او د کانونو او پټرولیم وزارت د مس عینک پروژې رییس انجنیر حمید الله حبيبي ترمنځ لاسلیک شو.
