د ننګرهار دکرنې ریاست: جلالآباد ښار کې پر یوشمېر راستنو شوو او کونډو کورنیو د چرګانو روزنې توکي ووېشل شول
۱۳ غبرګولی ۱۴۰۵ هـ.ش
۱۷ ذُوالحجّة ۱۴۴۷ هـ.ق
د ننګرهار د کرنې، اوبو لګولو او مالدارۍ ریاست په هڅو، د پرمختګ او نوښتونو «اومید» مؤسسې په همکارۍ، د جلالآباد ښار د اتمې ناحیې ۲۵ راستنو شوو هېوادوالو او کونډو کورنیو ته د چرګانو روزنې او ساتنې اړین وسایل ووېشل شول.
د ننګرهار د کرنې، اوبو لګولو او مالدارۍ رییس مولوي عبدالستار محمد د یادو مرستو د وېش پر مهال وویل، چې د پروګرام له مخې هرې ټاکل شوې کورنۍ ته د چرګانو د ساتنې لپاره یوه مرغانچه له دروازې سره، دوه جالۍ لرونکې کړکۍ، دوه د اوبو لوښي، دوه د دانې لوښي، پنځه متره جالۍ، موزې، ماسک او دستکشې ورکړل شوې دي، ترڅو د چرګانو د روزنې لپاره مناسب چاپېریال رامنځته شي.
نوموړي زیاته کړه، چې د پروژې په راتلونکو پړاوونو کې به هرې کورنۍ ته ۳۰ قطعې چرګان او ۱۵۰ کیلوګرامه متراکمه خوراکه هم ووېشل شي، څو د کورنیو لپاره د عاید یوه دوامداره سرچینه برابره او د کوچنۍ کچې مالدارۍ فعالیتونه پیاوړي شي.
د ننګرهار د کرنې رییس په وینا، د دغو مرستو موخه د راستنو شوو او بېوزلو کورنیو اقتصادي ملاتړ، د چرګانو روزنې له لارې د هغوی د لومړنیو اړتیاوو پوره کول، د مالدارۍ سکتور پراختیا او په سیمه کې د خوړو خوندیتوب پیاوړتیا ده.
د یادونې وړ ده، چې د ننګرهار د کرنې ریاست د مرستندویه مؤسسو په همکارۍ د کلیوالو او اړمنو کورنیو د اقتصادي پیاوړتیا لپاره ورته پروګرامونه پلي کوي، چې له لارې یې د عایداتو د زیاتوالي ترڅنګ د مالدارۍ او کرنې سکتور د ودې لپاره هم عملي ګامونه پورته کېږي.
