د کندهار په باغپُل سیمه کې د ۱۹ کارټنه قاچاقي کرنیزو درملو د انتقال مخه ونیول شوه
۴ غبرګولی ۱۴۰۵ه.ش
۸ ذُو الحِجَّةِ ۱۴۴۷ه.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د بوټې ژغورنې مدیریت د قرنطین مسؤلینو د کندهار ښار د اوومې ناحیې اړوند باغپُل سیمه کې د ۱۹ کارټنه قاچاقي کرنیزو درملو د انتقال مخه ونیوله.
د مسؤلینو په وینا، په نیول شویو توکو کې د کرنیزو نباتاتو بېلابېل ډوله درمل شامل وو، چې غوښتل کېدل په پټه او غیر قانوني توګه د هلمند بارمچي له لارې د ۵۸۰ ډوله موټر په وسیله کندهار ښار ته ولېږدول شي.
سرچینې زیاتوي، یاد درمل د قرنطین مسؤلینو د پر وخت هڅو او همغږۍ په پایله کې د باغپُل په سیمه کې کشف او ضبط شول، او د قاچاق هڅه یې شنډه کړه.
د یادونې وړ ده، چې څه موده وړاندې هم د همدې مسؤلینو له لوري له پاکستان څخه کندهار ته د ۱۵ کارټنه قاچاقي کرنیزو درملو د انتقال مخه نیول شوې وه.
د کرنې ریاست مسؤلین وایي، د غیر قانوني او بې کیفیته کرنیزو درملو د قاچاق پر وړاندې به خپلې هڅې لا ګړندۍ کړي، څو د بزګرانو، کرنیزو حاصلاتو او چاپېریال خوندیتوب یقیني شي.
