د میدان وردګو دایمیرداد ولسوالی کې ۱۵۰ مستحقو بزګرانو ته د هوږې کرکیلې تشویقي کیټونه ووېشل شول
۲۴ غویی ۱۴۰۵ه.ش
۲۷ ذُو ٱلْقَعْدَةِ ۱۴۴۷ه.ق
د میدان وردګو ولایت د کرنې، اوبولګولو او مالدارۍ ریاست تر چتر لاندې، د دایمیرداد ولسوالی په بېلابېلو سیمو کې د بزګرانو د ملاتړ او کرنیزو حاصلاتو د پیاوړتیا په موخه ۱۵۰ تنو مستحقو بزګرانو ته د هوږې کرکیلې اړوند تشویقي کیټونه ووېشل شول.
دغه مرستې د «کلیوالي ودې او پراختیا پروګرام» تر عنوان لاندې د ډاکار مؤسسې له لوري، د دایمیرداد ولسوالی د کرنیزو چارو مدیریت په همغږۍ ترسره شوې، چې موخه یې د بزګرانو ملاتړ، د کرنیزو محصولاتو زیاتوالی او د هغوی اقتصادي وضعیت ښه کول دي.
یاد پروګرام تېره چهارشنبه، د ۱۴۰۵ هـ.ش کال د غویي میاشتې په ۲۳مه نېټه ترسره شو. په دې لړ کې هغو بزګرانو ته یاد کیټونه ووېشل شول، چې له دې وړاندې ورته د هوږې تخم، تورې سرې او سپینې سرې هم ورکړل شوې وې.
د چارواکو په وینا، دغه کیټونه د هوږې د خیشاوې، راټولولو او بازار ته د لېږد په موخه برابر شوي وو، څو بزګران وکولای شي خپل محصولات په اسانه او معیاري ډول مدیریت کړي.
په وېشل شوو کیټونو کې بېلچې، د هوږې د راټولولو جالۍ، بازار ته د انتقال بوجۍ، پلالکش او د خیشاوې رمبي شامل وو.
د یادو مرستو له ترلاسه کولو وروسته بزګرانو خپله خوښي څرګنده کړه او د میدان وردګو د کرنې ریاست او ډاکار مؤسسې څخه یې د زړه له کومې مننه وکړه. هغوی همداراز غوښتنه وکړه، چې په راتلونکي کې دې ورته نورې مرستندویه او پرمختیايي پروګرامونه هم پلي شي.
