کندهار کې د کرنیزو درملو د قاچاق مخه ونیول شوه؛ ۱۵ کارټنه ناقانونه مواد ضبط شول

۶ غویی ۱۴۰۵ه‍.ش
۹ ذُو ٱلْقَعْدَةِ ۱۴۴۷ه‍.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د بوټو ژغورنې مدیریت د قرنطین مسؤلینو د کندهار ښار د اوومې ناحیې د باغ‌پُل په سیمه کې د ۱۵ کارټنه کرنیزو درملو د قاچاق مخه ونیوله.
د قرنطین مسؤلینو په وینا، په دغو نیول شویو درملو کې د کرنیزو نباتاتو بېلابېل ډولونه شامل وو، چې غوښتل یې په پټه او غیرقانوني ډول د هلمند له بارمچې لارې کندهار ته انتقال کړي. هغوی زیاته کړه، چې د امنیتي ارګانونو په همکارۍ دغه درمل د کندهار ښار په اوومه ناحیه کې ونیول شول، ضبط شول او وروسته د قانوني اجراآتو لپاره د کندهار ګمرک ریاست ته وسپارل شول.
مسؤلین ټینګار کوي، چې د کرنیزو درملو ناقانونه واردات کولای شي د کرنې سکټور، د خلکو روغتیا او چاپېریال ته جدي زیانونه ورسوي، له همدې امله به د ورته مواردو پر وړاندې خپل نظارتونه لا پسې سخت کړي.
د یادونې وړ ده، چې یوه ورځ وړاندې هم د همدې مسؤلینو له خوا له پاکستان څخه کندهار ته د ۱۵۰ کیلوګرامه ککړو غوښو د قاچاق مخه نیول شوې وه، چې دا د ناقانونه توکو پر وړاندې د دوی د جدي مبارزې څرګندونه کوي.