د هلمند مرکز لښکرګاه کې کروندګرو ته د نباتي افتونو د مخنیوي عملي روزنه ورکړل شوه
۱ غویی ۱۴۰۵ه.ش
۴ ذُو ٱلْقَعْدَةِ ۱۴۴۷ه.ق
د هلمند ولایت د کرنې، اوبو لګولو او مالدارۍ ریاست اړوند د کرنیزو چارو امریت د بوټوساتنې او قرنطین لوی مدیریت مسلکي کارکوونکو د خپلو دوامداره پروګرامونو په لړ کې د مرکز لښکرګاه د کاریز سیمې یو شمېر کروندګرو او بڼوالو ته د نباتي افتونو او ناروغیو د مخنیوي په اړه روزنه وړاندې کړه.
په دې روزنیز پروګرام کې بزګرانو ته د انارو مچ، د غنمو کفشک حشرې، د بانجانو چنجی، نباتي کنو، نباتي شپږیو، د ریښه خوړونکي چنجی، د مېوې مچ او نورو زیانمنو حشراتو د پېژندنې او مخنیوي په اړه معلومات ورکړل شول. همداراز، د افتونو پر وړاندې د میخانیکي او کیمیاوي لارو چارو په اړه عملي سپارښتنې شریکې شوې.
مسلکي کارکوونکو ټینګار وکړ چې کروندګر دې تر ډېره د افتونو د کنټرول لپاره له میخانیکي او وقایوي لارو چارو څخه کار واخلي او د کیمیاوي درملو له خپلسري استعمال څخه ډډه وکړي، ځکه دا درمل د چاپېریال د ککړتیا لامل ګرځي او په سبو، مېوو او اوبو زیرمو کې جذبېږي، چې د انسانانو او حیواناتو لپاره بېلابېلې ناروغۍ رامنځته کولی شي.
هغوی زیاته کړه، چې د اړتیا پر مهال دې یوازې انتخابي او غیر مضره درمل وکارول شي، څو په محصولاتو کې لږ جذب ولري او چاپېریال ته یې زیان کم وي. همدارنګه، بزګرانو ته سپارښتنه وشوه، چې تر درملنې مخکې وقایوي تدابیر عملي کړي، هرزه واښه له منځه یوسي، مقاوم تخمونه وکري، پر وخت عضوي او کیمیاوي سرې وکاروي او منظمې اوبه ورکړي.
د یادو لارښوونو په عملي کولو سره به بزګران وکولی شي، چې باکیفیته حاصلات تر لاسه کړي او خپل اقتصادي وضعیت ښه کړي.
