د کرنې وزارت له لوري په هلمند کې له کډوالۍ راستانو شویو څه باندې ۱۲۰۰ کورنیو ته د مرستو بهیر پای ته ورسېد
۲۱ سلواغه ۱۴۰۴ه.ش
۲۲ شَعبان المُعَظّم ۱۴۴۷ه.ق
د کرنې، اوبو لګولو او مالدارۍ وزیر عطاءالله عمري له لوري له کډوالۍ د راستنو شويو کډوالو د مرستو د وېش بهیر، چې څه موده وړاندې د هلمند په ولایت کې شوی و، په بریالیتوب سره پای ته ورسېد. په دې لړ کې په هلمند ولایت کې ۱۲۵۰ تنه اړمن راستنې شوي کډوال د خوراکي غنمو او نغدو پیسو له مرستو برخمن شول.
دغه بهیر د هلمند ولایت د کرنې، اوبو لګولو او مالدارۍ ریاست له خوا د اړوندو ادارو سره په بشپړې همغږۍ، منظم پلان، بشپړ شفافیت او عادلانه ډول عملي شو، تر څو مرستې رښتینو مستحقو کورنیو ته ورسېږي.
یاد انساني او خیریه اقدام د اسلامي امارت د مشرتابه عاليقدر امیرالمؤمنین حفظهالله تعالی د ځانګړي حکم، پېرزوینې او شفقت پر بنسټ، د کرنې، اوبو لګولو او مالدارۍ وزارت له لوري تطبیق شو. د دې پروسې پر مهال په هلمند ولایت کې ۱۲۵۰ تنه راستنې شوي اړمن کډوال د مرستو مستحق وپېژندل شول.
د یادو کورنیو د لومړنیو اړتیاوو د پوره کولو په موخه، هرې کورنۍ ته پنځه زره افغانۍ نغدي او ۲۵۰ کیلوګرامه خوراکي غنم ورکړل شول. د مرستو د وېش چارې د هلمند دکرنې ریاست، د اړوندو ادارو په همکارۍ او د منظم میکانېزم له مخې، په شفاف او عادلانه ډول ترسره شوې.
د یادونې وړ ده، چې دا بهیر یوازې په هلمند ولایت پورې محدود نه دی، بلکې د هېواد په کچه روان دی او د کرنې، اوبو لګولو او مالدارۍ وزارت له لوري په ټولو ولایتونو کې پر زرګونو راستنو شويو کډوالو د خوراکي او نغدي مرستو د وېش لړۍ پیل شوې، تر څو د هغوی ستونزې راکمې، د عزتمند ژوند د بیا پیل زمینه برابره او ټولنیز ثبات پیاوړی شي.
