د خوست اسمعیلخیلو او مندوزیو ولسوالۍ کې د ژمني تیلو د محلول پاشۍ پروګرام ترسره شو
۱۶ سلواغه ۱۴۰۴ه.ش
۱۷ شَعبان المُعَظّم ۱۴۴۷ه.ق
د خوست ولایت د کرنې، اوبو لګولو او مالدارۍ ریاست د بوټو ساتنې او قرنطین عمومي مدیریت مسلکي کارکوونکو له لوري، د اسمعیلخیلو او مندوزیو ولسوالۍ په بېلابېلو باغونو کې د ژمني تیلو د محلول پاشۍ پروګرام ترسره شو.
ژمني تیل د نباتي افتونو د مخنیوي او کنټرول لپاره کارول کېږي او د ژمي موسم یې د استعمال مناسب وخت دی. د دې محلول پاشۍ له لارې مېوه لرونکې ونې د ژمي له یخنۍ خوندي کېږي او په ونو کې موجود زیانرسونکي حشرات له منځه وړل کېږي.
د یادونې وړ ده، چې ژمني تیل یوازې په هغو ونو کارول کېږي، چې پاڼې یې تویېږي؛ لکه مڼه، زردالو، بادام، الوچه او نورې مېوه لرونکې ونې، او په تلشینو ونو کې د استعمال وړ نه دي.
دغه پروګرام د بڼوالۍ د پیاوړتیا او د بزګرانو د حاصلاتو د ښه والي په موخه تطبیقېږي.
