د خوست ګربزو کې د هیلو نوی پیل؛ سل کورنیو ته د چرګانو پالنې توکي ووېشل شول
۱۶ سلواغه ۱۴۰۴ه.ش
۱۷ شَعبان المُعَظّم ۱۴۴۷ه.ق
د خوست ولایت د کرنې، اوبو لګولو او مالدارۍ ریاست لهخوا د افغان پرمختیایي موسسې په مالي او تخنیکي ملاتړ، د ګربزو ولسوالی په لسو کلیو کې پر سل مستحقو کورنیو د چرګانو خوراکي توکي او اړوند وسایل ووېشل شول.
یادې مرستې د بوریخېل، ملیف بوریخېل، خړګۍ، ګړم، ګرده مېله، منګله، منګل پوره، نیازیخېل، باړای او سرکۍ کلیو مستحقو کورنیو ته ورسېدې، چې موخه یې د کلیوالو کورنیو د اقتصادي وضعیت ښه والی او د عاید بدیلو سرچینو رامنځته کول دي.
په دې وېش کې هرې کورنۍ ته سل کیلوګرامه د چرګانو خوراکه، درې دانې د دانې لوښي او درې دانې د اوبو لوښي ورکړل شول. همدارنګه ټاکل شوې ده، چې انشاءالله په راتلونکو څو ورځو کې به یادو کورنیو ته چرګان هم ووېشل شي، تر څو دا پروګرام لا اغېزناک تمام شي.
دا وېش د ټاکل شوو معیارونو پر بنسټ، په منظم او شفاف ډول ترسره شو. د پروګرام اساسي موخه د بېوزلو کورنیو د عاید سرچینو پیاوړتیا، د چرګانو د ساتنې اسانتیا، د کورني اقتصاد وده او د غذایي خوندیتوب ښه والی بلل کېږي.
د مرستو د وېش بهیر د افغان پرمختیایي موسسې د استازو، د سیمې د مخورو او د ګټهاخیستونکو کورنیو په حضور کې ترسره شو، تر څو د شفافیت، حساب ورکونې او پر وخت د مرستو د رسېدو ډاډ ترلاسه شي.
تمه ده، چې د دې پروګرام له پلي کېدو سره به مستحقې کورنۍ وتوانېږي د چرګانو ساتنه په ښه ډول پر مخ یوسي، د خپلو کورنیو عاید لوړ کړي او د خوړو د اړتیاوو یوه مهمه برخه پوره کړي.
