لغمان کې د نیالګیو کېنولو کمپاین رسماً پیل شو
۹ سلواغه ۱۴۰۴ه.ش
۱۰ شَعبان المُعَظّم ۱۴۴۷ه.ق
دلغمان دکرنې،اوبولګولو او مالدارۍ ریاست په هڅو په دغه ولایت کې د نیالګیو کېنولو کمپاین د لغمان والي قاري بختیار معاذ په حضور کې رسماً پیل شو.
د یاد کمپاین د پرانیستې په مراسمو کې د لغمان والي ترڅنګ د کرنې، اوبولګولو او مالدارۍ رییس مولوي عبدالستار محمد، مستوفي شیخ محمد امین او یو شمېر نورو ولایتي چارواکو ګډون کړی و.
د کرنې رییس مولوي عبدالستار محمد وویل، چې سږ کال به په ټول لغمان ولایت کې ۹۷۶ زره ۸۳۶ مثمر او غیر مثمر نیالګي کېنول شي، چې له دې ډلې څخه تر ۱۸ زره زیات نیالګي د کرنې، اوبولګولو او مالدارۍ ریاست له لوري او پاتې نور د خصوصي قوریو او مؤسسو له خوا کېنول کېږي.
د لغمان یو شمېر اوسېدونکو د هېواد د سرسبزۍ په موخه پر ټولو هېوادوالو غږ وکړ، چې هر څوک دې لږ تر لږه یو نیالګی د ځان او یو د هېواد لپاره کېنوي، تر څو د هېواد ښکلا او شنه فضا لا پراخه شي.
په ورته مهال د لغمان والي قاري بختیار معاذ د نوي کال په پیل کې د نیالګیو له کېنولو خوښي څرګنده کړه او ویې ویل، چې د دې کمپاین په پایله کې به شین لغمان لا سرسبز شي، هېواد به زرغون شي او د اکسیجن په تولید کې به مهم رول ولوبوي. نوموړي له ټولو هېوادوالو وغوښتل، چې د نیالګیو په ساتنه کې جدي هڅې وکړي، تر څو له ضایع کېدو څخه وساتل شي.
د یادونې وړ ده، چې هر کال د پسرلي په موسم کې د هېواد په بېلابېلو ولایتونو کې د نیالګیو د کینولو کمپاینونه تر سره کېږي، تر څو وطن زرغون او طبیعي ښکلاوې یې زیاتې شي.
