فاریاب ولایت کې هېواد ته راستانه شویو کډوالو ته د غنمو او نغدي پیسو د وېش لړۍ پیل شوه
۷ سلواغه ۱۴۰۴ه.ش
۸ شَعبان المُعَظّم ۱۴۴۷ه.ق
د هېواد ته د راستانه شویو کډوالو د وضعیت د رسېدنې په موخه، د غنمو او نغدي پیسو د وېش مراسم د ریاستالوزراء د اداري مرستیال، د کرنې، اوبو لګولو او مالدارۍ وزیر او د فاریاب ولایت د یو شمېر ځایي چارواکو په حضور کې، د دې ولایت په مرکز میمنې ښار کې ترسره شوه.
په دغو مراسمو کې، د ریاستالوزراء اداري مرستیال مولوي عبدالسلام حنفي او د کرنې، اوبو لګولو او مالدارۍ وزیر مولوي عطاءالله عمري فاریاب ولایت ته د سفر په ترڅ کې، هېواد ته راستانه شویو کډوالو ته د مرستو د وېش لړۍ په رسمي ډول پیل کړه.
د افغانستان اسلامي امارت د ریاستالوزراء اداري مرستیال مولوي عبدالسلام حنفي، په خپله وینا کې ټینګار وکړ چې اسلامي امارت په خپل ټول توان سره د راستانه شویو کډوالو په خدمت کې دی او د هغوی ستونزو ته رسېدنه د حکومت له اساسي مسؤلیتونو څخه ګڼي. نوموړي زیاته کړه، چې کډوالو ته د باعزته ژوند د زمینې برابرول د اسلامي امارت له مهمو لومړیتوبونو څخه دي.
همدارنګه د کرنې، اوبو لګولو او مالدارۍ وزیر مولوي عطاءالله عمري وویل، چې اسلامي امارت هڅه کوي څو د هېواد ځورېدلي خلک په ارامه فضا کې، په اسانتیا او د راتلونکي په هیله ژوند وکړي او په بېلابېلو برخو کې له اړینو ملاتړونو برخمن شي.
ورپسې، د فاریاب ولایت والي مولوي عبدالاحد فضلي، د لوړپوړو چارواکو هرکلی وکړ او د هغوی حضور یې د دې ولایت د خلکو لپاره د ویاړ او ډاډ لامل وباله، او د کډوالو اړتیاوو ته د رسېدنې په برخه کې یې د امارتي ادارو پر دوامدارې همکارۍ ټینګار وکړ.
په دغو مراسمو کې د فاریاب امنیه قوماندان، د استخباراتو رییس، د امارتي ادارو رییسان، او همدارنګه د دې ولایت ملکي او نظامي کارکوونکي هم ګډون درلود.
په پای کې، هرې کډوالې کورنۍ ته پنځه زره افغانۍ نغدي پیسې او پنځه بوجۍ پنځوس کیلویي، غنم ووېشل شول.
