دهلمند بولان څېړنیز فارم کې د غنمو د تجربو او مورني تخمونو د تولید بهیر پیل شو

۲۱ لړم ۱۴۰۴ هـ.ش
۲۱ جُمَادَى الأول ۱۴۴۷ هـ.ق
د هلمند ولایت کرنې، اوبولګولو او مالدارۍ ریاست  دکرنیزو چارو آمریت اړوند د څېړنو مدیریت مسئولینو د بولان څېړنیز فارم په سیمه کې د غنمو د نوو تجربو، هستوي او مورني تخمونو د تولید چاري رسماً پیل کړې.
د څېړنیزو چارو د پیاوړتیا او د باثباته تخم تولید په موخه، د کرنیزو څېړنو عمومي مدیریت له لوري د ۱۴۰۴ او ۱۴۰۵ کلونو لپاره لس  ۱۰ سیټه د غنمو تجربه‌يي قطعاتو څخه د شاوخوا ۱۷.۳ ټنه د غنمو مورني تخم تولید پلان هدف ټاکل شوی، چې د یاد مدیریت له‌خوا به په بشپړ ډول تطبیقېږي.
د هلمند دکرنې ریاست د چارواکو په خبره د یادو تجربوي قطعو لومړنۍ کرنه ترسره شوه، چې په دې سره د غنمو د علمي څېړنو نوې پړاو پیل شو.
په همدې ډول، په یاد فارم کې د جوارو پنځه سیټه تجربو لپاره د معلوماتو راټولول، رفع حاصل او د جوارو د مورني تخم د راټولولو چارې هم دوام لري، څو د راتلونکو فصلونو لپاره معیاري او لوړ حاصلات لرونکي تخمونه تولید شي.
دیاد فارم چارواکي وايي، چې د دغو تجربو پایلې به د هلمند بزګرانو سره د اصلاح شوو تخمونو په برخه کې د علمي لارښوونو او ښه حاصل تر لاسه کولو کې مهم رول ولوبوي.