پکتیا کې د اوبولګولو د دوو پروژو رغنیزې چارې پیل شوې

۲۱ زمری ۱۴۰۴ هـ.ش
۱۸ صَفَر المُظَفَّر ۱۴۴۷ هـ.ق
د پکتیا دکرنې، اوبولګولو او مالدارۍ ریاست چارواکي وايي، چې ددې ولایت د مرکز ګردیز په حبیب کلا او دغه راز د احمدابا وسوالی د سلام خېلو په کلي کې د اوبولګولو د دوو سیفونونو او کانالونو رغنیزې چارې د یولړ مراسمو په ترڅ کې پیل شوې.
په دغو مراسمو کې د پکتیا د کرنې، اوبولګولو او مالدارۍ ریاست د طبیعي سرچینو آمر مولوي رفیع الله، د کرنې متخصص انجینر سید حسن تکل، د طبیعي سرچینو د انجینري برخې مسؤل انجینر سجاد، د افغانستان لپاره د ناروي کمیټې مسئولین، د سیمې مشران او بزګران ګډون کړی و.
د بنسټ ډبرې اېښودو پر مهال مولوي رفیع الله د سلام خېلو او حبیب کلا اوسېدونکو ته د پروژې د پیل مبارکي ورکړه او ویې ویل: «د سلام خېلو سفون او کانال ۱۹ متره اوږدوالی، ۶۰ سانتي متره پلنوالی او ۸۰ سانتي متره لوړوالی لري، او د حبیب کلا سیفون او کانال ۱۵ متره اوږدوالی، ۶۰ سانتي متره پلنوالی او ۸۰ سانتي متره لوړوالی لري.»
ښاغلي رفیع الله زیاته کړه: «بزګران د هېواد آبادوونکي دي او موږ هڅه کوو چې د هغوی د کرنیز اقتصاد د پیاوړتیا لپاره اړینې او ګټورې پروژې پلي کړو.»
یادې دواړه پروژې د افغانستان لپاره د ناروي کمیټې له خوا د اروپايي ټولنې په تمویل جوړېږي. د دې پروژو په بشپړېدو سره به ۵۰ سلنه د اوبو ضایعاتو مخنیوی وشي، شاوخوا ۱۱۶۰ جریبه کرنیزه ځمکه به خړوبه شي، او د سیمې ۱۰۰۰ کورنۍ به ترې مستقیمه ګټه واخلي.
د احمد ابا ولسوالۍ او مرکز ګردیز اوسېدونکو د پکتیا د کرنې، اوبولګولو او مالدارۍ ریاست څخه مننه وکړه، چې د کرنې د پراختیا او د بزګرانو د ژوند د ښه والي په برخه کې په سیمه کې ګټورې پروژې پلي کوي.