د کندهار سپین بولدک کې د سلګونه پسونو د قاچاق مخه ونیول شوه
۲۷ غبرګولی ۱۴۰۴ ه.ش
۲۰ ذُو الحِجَّةِ ۱۴۴۶ه.ق
د کندهار د کرنې، اوبو لګولو او مالدارۍ ریاست په مشرۍ، د سپین بولدک ولسوالۍ د کرنې، مالدارۍ او امنیتي ادارو په ګډو هڅو، د څارویو د قاچاق د مخنیوي لپاره پراخ ګرځنده کمپاینونه پیل شوي دي. یاد کمپاینونه د لوی اختر له څلورمې ورځې راهیسې دوام لري، چې په ترڅ کې یې د فرضي کرښې د کنډکونو مسؤلینو د یو زرو ۶۶۷ پسونو د قاچاق هڅه شنډه کړې ده.
د سپین بولدک ولسوالۍ چارواکي وايي، ځینو کسانو هڅه کوله چې دغه پسونه د فرضي کرښې له لارې په غیرقانوني ډول پاکستان ته قاچاق کړي، خو د سرحدي ځواکونو او مسؤلو ادارو په چټک اقدام دا هڅه ناکامه شوې ده.
سرچینې زیاتوي، د قاچاق په تړاو ځیني کسان هم نیول شوي، چې د لا نورو څېړنو لپاره اړوندو ارګانونو ته سپارل شوي دي.
د کندهار د کرنې ریاست وايي، د څارویو قاچاق د سیمې د مالدارۍ سکتور ته جدي زیان رسوي، او د دغې لړۍ د مخنیوي لپاره یې له آمنیه قومندانۍ سره په ګډه هڅې زیاتې کړې دي. د یاد ریاست د معلوماتو له مخې، د اختر له را رسیدو وړاندې هم د ۶زره او ۳۲۲ څارویو د قاچاق مخنیوی شوی و.
چارواکي ټینګار کوي چې د دغه ډول غیرقانوني کړنو پر وړاندې به کمپاینونو ته دوام ورکړي، ترڅو د سیمهییزو بزګرانو او مالدارانو اقتصادي زیانونه راکم شي.
