لغمان ولایت کې ۲۵ مالدارو کورنیو ته د باجرې تخم او اړونده وسایل ووېشل شول

۲۳ غویی ۱۴۰۴ ه‍.ش
۱۵ ذُو ٱلْقَعْدَةِ ۱۴۴۶ه‍.ق 
د لغمان د کرنې، اوبو لګولو او مالدارۍ ریاست تر چتر لاندې، او د افغانستان لپاره د هالینډ کمیټې (ډي،سي،اې) په مالي مرسته، د لغمان ولایت د مرکز مهترلام او قرغیو ولسوالۍ ۲۵ تنو مستحقو مالدارانو ته د باجرې تخم، کیمیاوي سرو او کرنیزو وسایلو مرسته وشوه.
دا مرسته د لغمان د کرنې، اوبو لګولو او مالدارۍ رییسالحاج مولوي عبدالستار محمد او د هالینډ کمیټې د ولایتي مسؤلینو له‌خوا رسماً پرانیستل شوه، چې په ترڅ کې یې هر مالدار ته ۷ کیلوګرامه د باجرې تخم،۱ کیلوګرامه یوریا (سپینه سره)، ۱ کیلوګرامه توره سره، یوه بېلچه او یوه کشک ورکړل شوي دي.
د لغمان دکرنې رییس مولوي عبدالستار محمد وویل، چې دا مرسته، چې ارزښت یې ۵۵ زره او ۲۵۵ افغانۍ دی، د مالدارانو لپاره د څارویو د خوراکي موادو د برابرولو، د مالدارۍ سکتور د پیاوړتیا، او د اړمنو کورنیو د اقتصادي وضعیت د ښه‌والي په موخه ترسره شوې ده.
نوموړي زیاته کړه، چې د باجرې کرنه د وچکالۍ ځپلو سیمو لپاره ډېره مناسبه ده، او کولای شي د څارویو لپاره یو ارزښتناک خوراکي منبع وي.
دا ډول مرستې به نه یوازې د مالدارانو اړتیاوې پوره کړي، بلکې د خوړو خوندیتوب او عوایدو د لوړوالي په برخه کې به هم رغنده اغېز ولري.