زابل کې د څارویو د خوندیتوب په پار د واکسینو کمپاین پیل شو

۲۵ لېندۍ ۱۴۰۳ه‍.ش
۱۳ جُمَادَى الثاني۱۴۴۶ه‍.ق
د زابل کرنې، اوبو لګولو او مالدارۍ ریاست په رهبرۍ او د اقتصاد ریاست په همغږۍ، د ملګرو ملتونو د خوړو او کرنې ادارې په مالي همکارۍ ددې ولایت پر زرګونو څارویو د طاعون، خولې او برسلوز د مخنیوي په پار د واکسینو کمپاین پیل شو.
د زابل دکرنې او مالدارۍ ریاست چارواکي وایي، چې ددې کمپاین په ترڅ کې پر څارویو ۲۴ زره د بروسلوز«حیواني محرقې»، ۱۶ زره د خولې او پښو ناروغیو د مخنیوي واکسینونه پلي کېږي.
 یاد کمپاین د څارویو د وژونکو ناروغیو د مخنیوي لپاره پلان شوی، چې موخه یې د طاعون، بروسلوز، خولې او پښو ناروغیو د کچې راټیټول، د څارویو روغتیا خوندي کول، او د مالدارانو اقتصادي زیانونو کمول دي. د دې واکسینونو له تطبیق سره به د څارویو شېدو او غوښې تولید نورمال پاتې شي، او د ناروغیو د خپرېدو مخنیوی به پر وخت ترسره شي.