کندهار نېش او میوند کې د غنمو او کیمیاوي سرې وېش لپاره نوم لیکنه پیل شوه
۵ لېندۍ ۱۴۰۳ه.ش
۲۳ جُمَادَى الأول ۱۴۴۶ه.ق
په کندهار کې د نېش او میوند ولسوالیو لپاره د غنمو اصلاح شوي تخم او کیمیاوي سرې د وېش په موخه د نوم لیکنې لړۍ د دویم ځل لپاره پیل شوه. دا پروسه د کرنې، اوبو لګولو او مالدارۍ ریاست په هڅو، د اقتصاد ریاست په همغږۍ، د کرنې او خوراک نړیوال سازمان (اف اې او) په مالي ملاتړ او د اکټیډ مؤسسې په تخنیکي همکارۍ ترسره کېږي.
د دې نوم لیکنې تر بشپړېدو وروسته به د نېش ولسوالۍ ۶۰۰ او د میوند ولسوالۍ ۸۰۰ اړمنو بزګرانو ته، چې د ۲ څخه تر ۵ جریبه پورې ځمکه لري او اقتصادي وضعیت یې ضعیف دی، ۵۰ کیلوګرامه د غنمو اصلاح شوی تخم، ۵۰ کیلوګرامه سپینه سره او ۵۰ کیلوګرامه توره سره ورکړل شي.
د نوم لیکنې پروسه د کرنې او مالدارۍ استازو، امنیه قوماندانۍ، استخباراتو او د کلیو استازو تر څارنې لاندې ترسره کېږي، ترڅو یوازې هغه کسان د مرستې لپاره وټاکل شي چې د تخم او سرې د پیرلو وس نه لري.
یادې مرستې په کندهار کې د اصلاح شویو تخمونو دودولو، د بزګرانو ملاتړ او د لږې ځمکې څخه د زیاتو حاصلاتو ترلاسه کولو په موخه ترسره کېږي.
د یادونې وړه ده، چې دوه ورځې وړاندې هم په ښورابک ولسوالۍ کې د ۳۰۰ اړمنو بزګرانو لپاره د نوم لیکنې لړۍ پیل شوې وه.
