د کرنې وزارت د عشر او زکات د عوایدو د محاسبې رییس په لغمان کې د عوایدو د روڼتیا په موخه ناسته وکړه 

د کرنې وزارت د عشر او زکات د عوایدو د محاسبې رییس مولوي سید مخدوم عبدالهادي هدایت او مل پلاوي یې په لغمان ولایت کې د عشر او زکات د راټولولو کارمندانو سره د عوایدو د روڼتیا او د تېر او سږ کال عوایدو د پرتله کولو په موخه ناسته وکړه.
د کرنې وزارت د عشر او زکات د عوایدو د محاسبې رییس مولوي سید مخدوم عبدالهادي هدایت او ورسره پلاوي، د لغمان ولایت د کرنې، اوبو لګولو او مالدارۍ ریاست د عشر او زکات د راټولولو کارمندانو سره ناسته وکړه. د دې ناستې موخه په شفاف ډول د عشر او زکات عوایدو راټولول او د تېر او سږ کال عوایدو پرتله کول وو. د کرنې رئیس مولوي عبدالستار محمد هم په دې ناسته کې حضور درلود او راغلي پلاوي ته یې د ښه راغلاست ترڅنګ د عوایدو د روڼتیا او ارزونې په برخه کې د هغوی د هڅو ستاینه وکړه.
د لغمان د کرنې رییس مولوي عبدالستار محمد د عشر او زکات د راټولولو کارمندانو ستونزې او غوښتنې له پلاوي سره شریکې کړې او د کارمندانو څخه یې وغوښتل، چې د پلاوي پوښتنو ته کره او پر وخت ځوابونه ورکړي. له دې وروسته، مولوي سید مخدوم عبدالهادي هدایت د خپل سفر موخې بیان کړې او د عشر او زکات د کارمندانو ستونزې، لاسته راوړنې، راتلونکي پلانونه او د تېر کال د عوایدو معلومات ترلاسه کولو په اړه یې خبرې وکړې. هغه د عشر او زکات مدیرانو ته د ستونزو د حل او غوښتنو پر ځای کولو ډاډ هم ورکړ.
د کرنې وزارت د عشر او زکات ریاست هڅه کوي، چې په ولایتونو او ولسوالیو کې د عشر او زکات عوایدو د راټولولو بهیر روڼ کړي او د عوایدو راپورونه په کره ډول ترتیب کړي. د دې بهیر له لارې، د تېر او سږ کال د عوایدو پرتله کول د روڼتیا په راوستلو کې د ادارې د ژمنتیا یوه برخه ده.