کندهار کې اړمنو کورنیو ته بلاربې وزې ووېشل شوې
د کندهار د کرنې، اوبو لګولو او مالدارۍ ریاست په همکارۍ د ایثار ټولنیز پرمختګ او فعاله غبرګون (ای.اس.ای.ای.آر) سازمان له لوري د کندهار ښار اتمې، نهمې او پنځهلسمې ناحیو ۳۵ بېوزلو کورنیو ته بلاربې وزې ووېشل شوې.
په دې مرسته کې، چې د څارویو روغتیا او صحت آمریت مسؤلینو تر څارنې لاندې ترسره شوه، هرې کورنۍ ته د ۲۲ زره افغانیو په ارزښت دوې بلاربې ګلابي نسل وزې ورکړل شوې، چې موخه یې د اړمنو کورنیو اقتصادي ملاتړ او د دوی ژوند ښه کول دي.
د یادونې وړ ده چې یوه اونۍ وړاندې د اسلامي هوساینې سازمان له خوا په ارغستان ولسوالۍ کې هم ۵۰۰ بېوزلو کورنیو ته ورته مرستې وېشل شوې وې.
