هلمند کې ۱۲۰ کب روزونکو ته د روزنې وسایل او چوزه ووېشل شوه

د هلمند ولایت د کرنې، اوبولګولو او مالدارۍ ریاست د مالدارۍ او حیواني روغتیا آمریت له لارې، د ځنځیري ارزښت مؤسسې په مالي همکارۍ، د لښکرګاه په شمول د لسو ولسوالیو ۱۲۰ تنو کب روزونکو ته د کبانو چوزه (بچیان) او اړین وسایل ووېشل شول.
دغه فارم لرونکي، چې په لښکرګاه، مارجې، نادعلي، ګرشک، باباجي، نوزاد، نهرسراج، موسی قلعه، ناوې او کجکي ولسوالیو کې د کبانو د روزنې فارمونه لري، هر یو ته ۱۰۰ دانې د کبانو چوزه، ۴ بوجۍ خوراکي مواد، د اوبو د تیزابیت معلومولو آله (پی‌اچ متر) او د اوبو د حرارت درجې معلومولو آله (ترمامیتر) په وړیا ډول ورکړل شول. دا وسایل د کرنې ریاست د کارکونکو د لارښوونو سره سم په فارمونو کې د ګټې اخیستنې لپاره وېشل شوي دي.
یاد ریاست په دې وروستیو کې په بېلابېلو برخو کې د کب روزنې فارمونو د ودې او پراختیا په پار، د فارم لرونکو سره مرستې کړې دي.