لوګر کې د تېر کال په پرتله د پیازو په حاصلاتو کې ۵.۷ سلنه زیاتوالی راغلی دی
۲۶ تله ۱۴۰۳ه.ش
۱۴ رَبِیعُ الْثاني ۱۴۴۶ه.ق
د لوګر د کرنې اوبولګولو او مالدارۍ ریاست چارواکي وايي، چې په یاد ولایت کې د تېرکال په پرتله سږکال د پیازو په حاصلاتو کې ۵.۷ سلنه زیاتوالی راغلی دی.
د لوګر ولایت دکرنې او مالدارۍ ریاست د عوایدو د تنظیم آمر قاري عبدالبصیرشاهد وایي، چې سږ کال د لوګر په کچه ټول ټال ۱۲۳۰ هکټاره ځمکه باندې پیاز کرل شوي و، چې له دغو کروندو څخه څه باندې ۴۳ زره ټنه حاصلات لاسته راغلي دي، چې ترلاسه شوي حاصلات د تېر کال په پرتله ۵.۷ سلنه زیاتوالی ښیي.
نوموړي سږ کال د کروندګرو په حاصلاتو کې د زیاتوالي اصلي علتونه ښه اقلیمي شرایط، بزګرانو ته د عامه پوهاوي برناموجوړول، پرهغوی د اړینو توکو وېشل او د اوبو د کچې لوړېدل یاد کړل.
د لوګر د کرنې او مالدارۍ ریاست د چارواکو په خبره تېر کال لوګر کې پر۱۲۲۰ هکتاره باندې پیاز کرل شوي و، چې له یادو کروندو څخه ۴۰۵۶۵ زره متریک ټنه حاصلات ترلاسه شوي وو.
باید وویل شي؛ چې سږ کال د پیازو نرخونه هم د تېر کال په نسبت ښه دي او یو من پیاز شاوخوا په ۱۵۰ افغانیو پلورل کېږي.
د یادونې وړ ده، چې لوګر کې د تېر کال په پرتله د غنمو، مڼو، انګور او بادامو په حاصلاتو کې هم د پام وړ زیاتوالی راغلی دی.
