د کندهار درو ولسوالیو کې بڼوالو ته د حاصلاتو راټولولو اړین توکي ووېشل شول
د کندهار کرنې، اوبو لګولو او مالدارۍ ریاست په هڅه د سولې بنسټ موسسې په مالي همکارۍ د نېش، غورګ او رغنداب ولسوالیو ۲۷۵ بڼوالو ته د انګورو، انارو او نورو مېوو د حاصلاتو راټولولو اړین توکي ووېشل شول.
په دې مرسته کې هر بڼوال ته یوه المونیمي زینه، د حاصل راټولولو یوه بسته او پنځه پلاستیکي جالۍ ورکړل شوې. دا توکي به بڼوالو ته اسانتیا برابره کړي چې خپل حاصلات په خوندي او اسان ډول راټول کړي.
یاد بڼوال مخکې د سولې بنسټ له لوري د ساحوي ښوونځي په نوم راجستر شوي وو او هره میاشت یې د بڼ جوړونې، اوبو لګولو، څانګو پرې کولو او د حاصل راټولولو په اړه روزنه ترلاسه کوله.
د یادونې وړ ده چې تېره اونۍ په میوند، شاولیکوټ، ژړۍ او خاکریز ولسوالیو کې هم ۳۶۲ بڼوالو ته ورته مرستې وېشل شوې وې.
