سره رود ولسوالی ته د ننګرهار دکرنې رییس سفر 

۲۰ وږی ۱۴۰۳ه‍.ش
۷ رَبِیعُ الْأَوَّل ۱۴۴۶ه‍.ق
د ننګرهار د کرنې، اوبولګولو او مالدارۍ رییس مولوي محمد ولي محسن د بزګرانو د ستونزو د حل او کرنې د پراختیا په موخه سره رود ولسوالی ته  داسې مهال سفر وکړ؛ چې د کرنې او مالدارۍ خونې رییس اجمل رحماني او نورو مسولینو یي ملتیا کوله.
 د ننګرهار دکرنې رییس د سره رود ولسوالی له امنیه قومندان او ترویج مدیرانو سره ناسته وکړه او د کرنې او مالدارۍ په برخه کې یې د ستونزو په اړه خبرې وکړې.
د سره رود امنیه قومندان عبدالخالق سیلاب او ترویج مدیر قاري خانزیب افضلي په دې ناسته کې د شېدو ټولولو مرکز ودانۍ، سړې خونې جوړولو، ګودامونو، روغنیاتو، بڼوالۍ، اصلاح شويو تخمونو زیاتوالي، مالدارۍ واکسینونو، حیواني خوراکي توکو او نورو اړونده برخو کې خپلې ستونزې او غوښتنې مطرح کړې.
 په همدې حال کې د ننګرهار دکرنې رییس مولوي محمد ولي محسن د بزګرانو او مالدارانو د ستونزو د حل او پرمختګ لپاره د هر راز همکارۍ ډاډ ورکړ.
هغه وویل، چې د سره رود ولسوالی اراضي د کرنې،  بڼوالۍ او سبو کرکېلي لپاره ښه مناسبه ده، او ژمنه یې وکړه چې د کرنې ریاست او همکارو موسساتو له لارې به مؤثرې پروژې پلي کړي. د دې پروژو موخه به د اصلاح شویو تخمونو ترویج، څارویو ته واکسینونه، مالدارۍ پرمختګ، حیواني خوراکي توکو وېش او بازار موندنه وي.
ښاغلي محسن همدارنګه د عشر او زکات مسؤلینو ته سپارښتنه وکړه، چې په خپلو کارونو کې روڼتیا او دیانت کار واخلي او د ا.ا.ا کړنلارې مطابق عمل وکړي. د ننګرهار کرنې ریاست هر کال په زرګونه بزګرانو او مالدارانو ته د کرنې او مالدارۍ په برخه کې مرستې وړاندې کوي.